JAKINTZA IKASTOLA ORDIZIA » txirrindularitza

Irene Usabiaga bi aldiz txapeldun Espainiako Tapelketan

jakintza ikastola — Sun, 12 Jul 2009 11:36:08 +0000

Irene Usabiaga ikastolako txirrindulariak kadete mailako Espainiako txapelketaren erlojupeko proba eta errepidekoa irabazi ditu. Ostegunean nagusitu zen erlojupekoan, 41 kilometro ordu pasako batez bestekoarekin proba erraz irabaziz. Judit Vidal kataluniarrari 31 segundo kendu zizkion. Ostiralean jokatu zen errepideko proba, eta esprintean irabazi zuen Usabiagak. Proba horretan ere Vidal kataluniarra izan zen bigarren.

Zorionak Irene!!!

Iturria: Goierriko Hitza

Ana Usabiaga munduko txapelketan

jakintza ikastola — Sat, 28 Mar 2009 13:30:10 +0000

Esan genizuen bezala, Anak pista estaliko Munduko Txapelketan egindakoaren berri eman nahi dizuegu.

Goierriko Hitzaren bitartez jakin dugu Espainiako selekzioak azkena amaitu duela taldekako jazarpen proban eta, beraz, Ana ere azken postuan sailkatu da.

Nolanahi ere, Jakintza Ikastolaren Komunitatea osatzen dugun guztiok harro gaude gure ikasle ohia den Anaren ibilbideaz eta, bere gaztetasuna aintzat harturik, ziur gaude behin baino gehiagotan bere arrakastak aipatu beharko ditugula.

Aurtengoa, Pruszkowen (Polonia) ospatutako txapelketa, Anarentzat lehen Munduko Txapelketa izan da eta eskarmentua hartzeko oso baliagarria izango da. Zorionak Ana eta eutsi goiari!!!

Ana Usabiaga Munduko txapelketara

jakintza ikastola — Wed, 18 Mar 2009 08:11:26 +0000

Gure ikasle ohia den Ana Usabiaga, albiste pozgarrien iturri bilakatzen ari da aspaldi honetan.

Gaur, Goierriko Hitzaren bitartez jakin dugu gure txirrindularia Pruszkow-en (Polonia) ospatuko diren Pista estaliko Munduko txapelketan izango dela taldekako jazarpen proban parte hartzeko. Txapelketa martxoaren 25etik 29ra ospatuko da eta Anarekin batera, besteen artean, Leire Olaberria txirrindulari ikaztegietarra izango da.

Jakintza Ikastolako talaia honetatik Anaren jarraipena egiten ahaleginduko gara eta, une honetan, zorterik hoberena opa nahi diogu. Aupa Ana!!!

Ana Usabiagak urrezko bi domina lortu ditu

jakintza ikastola — Sun, 08 Feb 2009 00:07:43 +0000

Ana Usabiaga txirrindulari ordiziarrak urrezko bi domina lortu ditu Espainiako pistako Txapelketan. Palma de Mallorcan jokatu ziren atzo txapelketako probak, eta euskal ordezkariek lan bikaina egin zuten. Izan ere, taldekako probetan lortutako garaipenez gainera, Leire Olaberriak eta Eneritz Iturriagak ere domina bana lortu zituzten.

Goierri Telebistan ateratako albistearen bideoa

Usabiagak, taldekako abiadura proba irabazi zuen goizean, Ainhoa Pagola tolosarrarekin batera; 38,09eko denbora egin zuten. Arratsaldean berriz, taldekako jazarpen proban lortu zuen urrezko domina, Leire Olaberriarekin eta Eneritz Iturriagarekin batera. Hirukoak, 3:42.24ko denbora egin zuen.

Iturria: Goierriko Hitza

Ana Usabiaga pista estaliko Europakoan

jakintza ikastola — Sat, 06 Sep 2008 10:09:59 +0000

Pista estaliko Europako txapelketan parte hartzen ari da Ana Usabiaga ordiziarra egunotan. Irailaren 3an hasi zen lehia Pruszkow-n (Polonia), eta gaur bukatuko da. Usabiaga hiru modalitatetan parte hartzekoa zen, emakumezko juniorren artean: jazarpenean, puntuaketan ta scratch-ean. Errepideko denboraldia azkenera gerturatzen ari da, eta neguan ziklo-kroseko egutegiari helduko dio. Pistan aurten urte oparoa ari da izaten gaztearentzat: Munduko txapelketan, Hegoafrikan, europar onena izan zen scratch-ean (6. orokorrean), eta puntuaketan 5. egin zuen. Maiatzean, berriz, mugarri historikoa ezarri zuen Espainiako txapelketan, Tafallan (Nafarroa). Zazpi domina kolkoratu zituen, sei urrezkoak. Polonian, momentuz, estatuko 2.000 metroko marka ondu du Usabiagak (2:32,04).