Gaur goizean, eta ikasturteari amaiera polit bat emateko, gure musikako irakasleak diren Marian Iturriotzek eta Miren Martinek emanaldi polit bat prestatu digute ikasturte osoan zehar landutako abesti eta koreografia batzuekin.

Lehen Hezkuntzako 2. eta 3. zikloko ikasleak ez dira kikildu eta “soltura” izugarria azalduz ikusi ditugu oholtzaren gainean. Egipto, Titanic, Ipar Amerikako indioak… izan dira, besteen artean, jorratu dituzten gaiak.

Bi irakasle hauei eta euren ikasleei eskerrak emanez eta emanaldian grabatutako bideoarekin amaitu nahi dugu mezu hau. Bide batez, guztioi oporrak ongi igaro ditzazuela opa nahi dizuegu.

Ostiralean argitaratu genuen mezuan esan genizuen bezala, azken eguneko bideoa ezin izan genuen argitaratu bideokamera egon behar ez zuen maletan gelditu zelako. Horren trukean, irteeran eskaini genituen zuzeneko emisioen bideo sorta bat utzi genizuen.

Gaur, korrika eta presaka bada ere, bideoa editatzea eta igotzea lortu dugu. Honekin, amaiera ematen diogu irteera honi egin diogun jarraipena eta, zuetako batzuek esan diguzuen bezala, ia ia CNN baino jarraipen profesionalagoa eman omen diogu irteerari. Guk ez dakigu hori horrela izan den, baina oso garbi gelditu da zuen jarraipena ikaragarria izan dela eta gure mezu horiek izan duten bisita kopuru ikaragarriarekin errekor batzuk apurtu dituzuela.

Gauzak horrela, Zumaian igaro genuen azken goizean grabatutakoarekin uzten zaituztegu. Eta baten bat despistatuta baldin badago, horren azpian, azken egun horietan argitaratu ditugun bideo eta argazkiak ere jartzen dizkizuegu. Ea zuen gustukoa den.

BIDEOAK

AZKEN EGUNA

BIGARREN ARRATSALDEA

BIGARREN EGUNA

LEHENENGO EGUNA

ARGAZKIAK

AZKEN EGUNA

BIGARREN EGUNA

LEHEN EGUNA

Gauza on guztiekin gertatzen den bezala, horrenbeste amesten genuen irteeraren amaiera iritsi da. Hala ere, egia esan behar badugu, ezazue pentsa penatuta gaudenik, ez horixe. Oso irteera polita eta interesgarria suertatu baita, eguraldi bikaina izan dugu, itsaso eta arrantzaren inguruan era askotako gauzak ezagutu eta egin ahal izan ditugu, lagunekin une zoragarriak pasatzeko aukera izan dugu, begirale oso jatorrak tokatu zaizkigu, irakasleak txintxo portatu dira… Ez dago gehiago eskatzerik. Gainera, irteeraren amaierak duen alde tristeari, gurasoen ondora itzultzearekin buelta errazago ematen baitzaio.

Gaur ez daukagu gauza gehiegi idazteko gogorik. Aurrez aurre kontatuko baitizkizuegu eta xehetasun guztiekin, gainera. Horregatik, mezu hau aprobetxatu nahi dugu gurekin egon diren guztiei eta gure mezuak ikastolako ikusienak bihurtu dituzten guztiei eskerrak emateko eta ohar pare bat emateko.

Lehen oharra: etxera itzultzearen emozioarekin, bideokamera egon behar ez zuen maleta batean gelditu da eta gaur ezingo dizuegu gaurko bideoa jarri. Hala ere, lasai, bihar ez bada, iganderako jarrita egongo baita. Horren truke, telefono batekin eskaini ditugun zuzeneko emisioen bideo labur batzuk jartzen dizkizuegu. Batzuk oso interesgarriak iruditu zaizkigu, batez ere, itsasontzian 3. mailakoei grabatutakoa.

Bigarren oharra: Argazki asko atera ditugu egun hauetan eta denak igotzeko sekulako zailtasunak izaten ari gara. Beraz, mezu honen amaieran ikusiko dituzuenak ez dira gaurko guztiak, baina larunbaterako denak egongo direlakoan gaude.

Beno, gure bideo eta argazkiekin uzten zaituztegu. DATORREN IRTEERARA ARTE!!!

BIDEOAK

ARGAZKIAK

Atzoko kronika laburrak izan duen arrakasta ikusita (zuen bisita kopuruarekin ikaratuta gelditu gara), gaurko pentsatuta genuen kronika zabaltzea erabaki dugu. Bideo bat baino gehiago eta luzeagoak jartzeaz gain, atzo konexioak utzi ez zizkigun gauzak egiten ahalegindu gara eta argazki bilduma potoloagoa topatu ahal izango duzue.

Goizean goiz hasi dugu gaurko eguna (batzuk goizegi gauza onerako), zeruaren urdintasunak egun zoragarria iragartzen zigun eta halaxe izan da: egun borobila zentzu guztietan. Eguraldi bikaina, jarduera oso politak eta biharko arrantza saioa ondo ateratzeko, egin beharreko prestakuntza guztiak egin ditugu. Ea bihar hegaluzeren bat harrapatzen dugun.

Gaurko antzerki, jolasak, arrantzarako apareju tailerrak, Edwinen eta Juleneren urtebetetze ospakizunek…. nahiko nekatuta utzi gaituzten arren, hementxe gaituzue fin-fin lanean gertatutakoaren berri zuei emateko. Beraz, ez gara gehiago luzatuko eta gaurko bideo pare eta argazki bildumarekin uzten zaituztegu. GOZA ITZAZUE!!!

GOIZEKO BIDEOA

ARRATSALDEKO BIDEOA

ARGAZKI BILDUMA

Azkenean, horrenbeste amesten genuen eguna iritsi da eta, jada, Zarautzen gaude pozarren.

Gaurko eguna ez da gaur hasi, izan ere, aspalditik burua horretan jarrita eduki dugu eta azken egun hauetan tripan antzematen genituen har horiek, azkenean, uxatzea lortu dugu. Bidaia ongi hasi dugu. Autobus bikain parea anexoan hartu eta laino beltzei aurre egiteko asmoz abiatu gara. Bidean, lau tantan erori zaizkigu eta andereñoak berehala larritu dira. Hauek bai estuak!!!

Zarautzera iritsi orduko, hasi da zerua argitzen eta andereñoen larritasuna desagertzearekin batera, Getariako bidea hartu eta hasierako aldapa gogorrari gogoz ekin diogu. Hura bai paisaia ederra: Zarautzeko hondartza luzea, malekoia, golf zelaia, txakolindegietako mahastiak, Getariako San Anton arratoia, kaia, itsas-argia… Paisaia zoragarri honekin, edonori ahazten zaizkio hasierako estuasunak.

Getarian, Elkano zain genuen eta iristean ongi-etorria eman digu. Bere bizitzari buruzko gorabeherak kontatu dizkigute eta mokautxoa egin ostean, portura joan eta bertan, arrantzale sareen artean, arrantzari buruzko jolas batean aritu gara. Antxoak arrantzatzerik ez dugu izan ordea. Baina, lasai!!! Bihar aparejo tailerrean egindakoarekin hegaluze eder bat arrantzatuko dugu. Beraz, badakizue, labea berotu ostiraleko afaritarako!!!

Uste baino afari goxoagoa jarri digute eta logeletan kontu-kontari ibili eta gero, lo egiteko garaia iritsi zaigu. Gaurko bideoarekin eta argazkiekin uzten zaituztegu. ONDOLOIN!!!

BIDEOA

ARGAZKIAK

Gaur goizean, Ordiziako Jakintza eta Urdanetako Lehen Hezkuntzako bigarren zikloko ikasleek egun zoragarria igaro dute Xibak antolaturiko ekitaldian.

Xiba egitasmoaren izaera hobeto ulertzeko, hobe izango da euren adierazpena irakurtzea:

XIBA, Euskal Herriko Ikastolen Konfederazioko proiektua da, Euskal Herri osoko partaidez osatua; Euskal herri guztirako eta guztientzat zabaldua. Gure egitasmoa EHIKtik jendarterako egiten dugun proposamena da, norberak bere bizia gozatuz, orekaz eta osasuntsu bizitzeko. Pertsonen garapenean ludikotasuna ezinbestekotzat daukagu eta elkarren arteko komunikazioan zutabe, bestela harreman hori hiltzen baita. Jolas eta jokoak tresna paregabea dira bizitzan gozatzeko eta horren bila joan nahi dugu.

«Kulturik gabe ez dago herririk eta jolas jokorik gabe ez dago kulturarik » zioen norbaitek. Gure arloaren bitartez, hau da euskal kulturarekin bat egiten duen euskal ludikotasunaren bitartez, euskal kultura eta euskara indartu nahi ditugu. Hara laburki azaldurik gure helburua zein den ; horretara heltzeko zer proposatzen dugu ?

Bada, hanka sartzeko beldurrik gabe, gaur Ordizian bizi izan dugunarekin, esan dezakegu euren helburuetako asko bete-betean lortu dituztela. Izan ere, goiza ezin hobea bizi izan dugu eta bi ikastetxeetako ikasleen artean oso giro polita sortu da.

Eta esaten dugunaren lekukoak, jarraian jarri dizkizuegun bideo eta argazki bilduma.

BIDEOA

ARGAZKIAK

Asteazkenean, hilaren 19an, Ordiziako Jakintzako 5. eta 6. mailako ikasleek Urdanetakoekin batera “Herri Antzokian” bertso jaialdi bikaina eskaini ziguten.

Emanaldi hau, ikasturte osoan zehar bertsolaritzaren inguruan egindako lanketaren amaiera izan da. Izan ere, Bertsozale Elkarteko kide eta bertsolaria den Amaia Agirre, astero ikastolako Lehen Hezkuntzako 3. ziklora dator gure ikasleak hitz, doinu eta errimekin jolas daitezen. Gela bakoitzak bi astez behin parte hartzen du proiektu honetan eta, nola ez, ikasleek ikasturte osoan zehar ikasitakoa eta ekoiztutakoa senide eta lagunen aurrean agertu nahi izaten dute.

Aurten guztiak batera kabitzen ez zirenez, bi emanaldi eskaini beharrean aurkitu ziren, 5. mailakoak alde batetik eta 6. mailakoak bestetik.

5. mailakoek oso gai ezberdinak jorratu zituzten; Zuberoako makil dantza, ikasturte amaierako bidaian gertatutako pasadizoa, urtebetetzeetako meriendak, alfabetoa, “Ordiziako Peria”… eta urduritasunak sortutako zirrarari kemenez eta ilusioz aurre egin zioten, emaitza oso polita lortuz. 6.mailakoak, berriz, mendizaleak bilakatu eta Txindokira bidean ikasleek izandako gorabeherak, bertsoz abestu zituzten, emanaldi atsegina eskainiaz. ZORIONAK guztiei!!!

Jarraian, emanaldian botatako ale bat eta bertan ateratako argazki bildumarekin uzten zaituztegu.

TXINDOKI, TXINDOKI
igoko deu aurki
TXINDOKI, TXINDOKI
pasako deu ederki.

Antzerkian irakasleak zirenak ere, beraien ezinegonak agertu zituzten:

Arrazoi dezu, ibilaldia
gehiegizkoa izan da.
Alde ederren egongo ginen
“tunbona” baten etzanda.

Izerdietan itto ditzagun
gure kexa eta penak
Umeak bueno, baino askotan
gurasoak dira okerrenak…..

ARGAZKIAK

Berdinen arteko Ikaskuntzari buruzko Bartzelonako Unibertsitate Autonomako Ikerketa Taldeak bultzatutako Proiektu honen burua den David Duran Gisbert-en eskutik “Bikoteka Irakurtzen” egitasmoa ikasturte honetan abian jarri dugu Lehen Hezkuntzako 6. mailan.

Proiektu honen helburuen artean, ikasle eta familiekin berdinen arteko tutoretza burutzea irakurmen konpetentzia hobetzeko nabarmentzen bada ere, bizikidetza sustatzeko eta beste baloreen lanketa burutzeko aukera paregabea eskaintzen du.

Hemen ez dugu proiektuaren xehetasun guztiak azalduko, baina ideia bat egiteko, jarraian, proiektuaren ezaugarri gutxi batzuk eta ikasleei ematen zaizkien aholkuetako batzuk ipintzen dizkizuegu. Horien azpian, saio arrunt batean bi geletan grabatutako bideoa eta ateratako argazki sorta bat uzten dizuegu.

EGUNERAKETA:

Proiektuko arduradunek (UABkoek) argitaratutako DVDtik bideo bat atera dugu eta ikastolako bideoaren azpian jarri dizuegu.

EZAUGARRIAK

• Proiektua ikasle, senide eta irakasleentzat zuzenduta dago. Guztiek prozesuaren ardura hartzen dute.
• Ikasleek rol ezberdinak betetzen dituzte: irakasle eta ikaslearen rola.
• Testuinguru ezberdinetako testuak hautatzen dira.
• Irakaslearen rola duenak testuaren prestakuntza etxean burutuko du.
• Gelan, elkarrekin irakurriko dute eta zuzentasuna bilatuko dute.
• Ulermena jorratzeko jarduerak burutuko dituzte.
• …

AHOLKUAK

• Etxean, ekintzen orrialdea prestatu. Zure ikasleak izan ditzakeen zailtasunak pentsatu eta bilatu nola konpondu.
• Ikasleak bakarrik irakurtzen duenean eta zuk PPP metodoa erabiltzen duzunean, gogoratu Pausa markatzen duzunean, emaiozu denbora berak bakarrik zuzentzeko. Pistekin, berdin. Eta beti bukatu behar duzu sarirako den P erabiliz, irakurtzen jarraitzeko animatuz.
• Ikasleak ahal dizu ez dakizun zerbait galdetu. Ez da ezer gertatzen. Esan argi eta garbi ez dakizula eta bien artean bilatu erantzuna. Hiztegia gertu edukitzea baliagarria da. Ahal diozu andereñoari / maisuari galdetu edo hurrengo saiorako utzi edota zuk bilatu erantzuna, zure kabuz.
• Gogoan eduki beti: erakustea ikasteko modurik hoberena da. Kontuan hartu zure ikaskideari lagunduz zuk ere hobetzen duzula.

BIDEOAK

ARGAZKIAK

Eguraldiak bat ere lagundu ez duen arren, urtero bezala, euskal inauteriak Ordiziara iritsi dira Jakintza Ikastolaren eskutik. Hotzak, elurrak, hezetasunak eta giro desatseginak ez dute lortu gure ikasleen animoa zapuztea eta, azkenean, emanaldi politak eskaini dizkigute bai Haur Hezkuntzako ikasleek baita Lehen Hezkuntzakoek eta DBH 1ekoek ere.

Lehen Hezkuntzako ikasleak Beti Alai frontoian aritu dira eta Haur Hezkuntzakoak Villa Eugeniako barruko jolastokian. DBH 1eko ikasleen Akelarrea, berriz, bi emanaldietan ikusteko aukera izan dugu.

Zakuzaharrak, Miel-Otxin, Sorginak, Txorimaloak, Kotilungorriak, Baserritarrak, Iñudeak eta artzainak, Luzaideko bolantak, Txori-izugarriak, Abaltzisketako txantxoak, Joaldunak… denak bikain aritu dira eta bildutako ikusleen errekonozimendua jaso dute txalo zaparrada beroen bitartez. Gure ikasleen ahalegina eta ilusioa ez zen gutxiagorako. Zorionak guztiei!!!

Grabatutako bideo eta argazkiekin uzten zaituztegu.

Bideoa:

Bideo hau Full HD kalitatean ekoiztu eta igo dugunez, kalitate osoz ikusteko, “Play” botoia sakatu eta gero, erreproduzigailuaren barraren eskuinaldean “360p” agertzen dela ikusiko duzue. Bada, sagua bere gainean jartzerakoan, beste aukera batzuk agertzen direla ikusiko duzue. Zenbakia zenbat eta altuagoa orduan eta kalitate hobea. Hori bai, bideoa kargatzeko ere zenbat eta kalitate handiagoa orduan eta denbora gehiago bideoa kargatzeko. Konexio ona baduzue edo denbora baduzue, merezi duelakoan gaude. Pantaila osoan jarri eta gozatu!!!

Goierri Telebistak argitaratu duen bideoa:

Goierri Telebistaren web orrian argitaratu duten bideoa

Argazkiak:

Txanela Proiektua da gure Lehen Hezkuntzan lantzen dugun proiektu globalizatua. 3. mailako ikasleek orain arte jorratu dituzten gaien artean, Ordizia izan da erabili dutena jendaurreko aurkezpena burutzeko.

Proiektuak sustatzen dituen konpetentziak indartu nahirik, aurkezpenaren planifikazioa eta antolaketa euren esku utzi da. Taldeetan antolatu ondoren, talde bakoitzak bere planifikazio orria prestatu eta beste taldeekin kontrastatu zuten aurkezpenaren ildo nagusia adosteko eta esparru ezberdinak txertatzeko.

8 urteko ikasle hauek prozesu horretan erakutsi duten ahalmena eta autonomia ez da nolanahikoa izan eta gisa honetako ardura euren gain hartzen zuten lehen aldia izan arren, oso zorrotz jokatu dute euren buruarekin eta ia ezertxo ere ez dute inprobisaziorako utzi.

Ikasten ikasi, elkarrekin bizitzen ikasi, ekiten eta egiten ikasi, komunikatzen ikasi eta norbera izaten ikasi dira Euskal Curriculumak sustatzen dituen bost konpetentzia orokorrak. Bada, hanka sartzeko inongo beldurrik gabe esan dezakegu bete-betean murgildu direla bost konpetentzia orokor horien lanketan eta garapenean. Horregatik, amaierako “produktua” baino, garrantzia handiagoa hartzen du prozesuan zehar burutzen duten guztia. Izan ere, horixe baita testuinguru egokiena arestian aipatutako konpetentziak lantzeko.

Jarraian dihoazkizuen bideoetan gai berdinaren inguruan gela bakoitzak eman duen ikuspegi ezberdina ikus daiteke, nahiz eta Ordiziar peto hauek ez duten alboan utzi gure gureak diren “Ordiziarrak Gara”, Ordiziako Martxa, Andres Urdaneta….

3.A gelakoen emanaldiaren bideoa:

3.B gelakoen emanaldiaren bideoa:

Argazkiak: