Korrika 16 bukatu da. Gora 17. Korrika!

Gaur, Korrikaren 16. edizioa, 11 egunetan 2503 km egin ondoren, helmugara iritsi da gaur eguerdian Gasteizera eta lekuko barruan eskurik esku ibili den mezu ezkutuaren edukia hauxe da:

Bada altxor bat mundu osoan euskaldunok bakarrik duguna. Ez da ezkutuan dagoen horietakoa, lurpean edo uharte bakarti batean gorderik dagoena, ez da filmetakoa ere. Altxor hori egiazkoa da, eta gu denona, denok elkarrekin partekatzeko modukoa.

Partekatuz bakarrik hartzen du bere benetako balioa, gainera. Altxor hori ezpainetan dugu, beti prest, emateko eta jasotzeko, edo biak batera, akaso. Asmatu al duzu dagoeneko zer den? Bai?…

Bai! Muxua da, edo… Bai! Euskara da. Edo biak batera. Biak baitira partekatzeko. Biak ezpainetan, goxo, zugandik gugana eta gugandik zugana. Guk nahi dugu, eta prest gaude. Eta zuk, eman nahi al diguzu muxu? Egingo al diguzu euskaraz?

Hara! Gu ez gara lau katu, eta zure lagunak gara. Beste hizkuntzak maite ditugu, eta ezagutu nahi ditugu, eta erabiltzen ditugu, baina bizi, euskaraz egin nahi dugu, mundua koloretakoa atsegin dugulako, eta ez zuri-beltza. Munduari gure kolorea eman nahi diogu, euskararena, etxetik hasita, Euskal Herritik.

Koloretan amestu nahi dugu, koloretan esnatu, jolastu, ikasi, kantatu, dantzatu, barre eta negar egin. Euskaraz irakurri nahi ditugu egunkaria eta ipuinak, euskaraz ikusi nahi dugu antzerkia eta zinema. Euskaraz entzun nahi dugu irratia. Euskaraz egin nahi dugu gaixorik gaudenean medikuarekin, erosketak egitean saltzailearekin, postariarekin, kale-garbitzailearekin, udaltzainekin eta alkatearekin. Eta batez ere euskaraz, noski, zuekin, gurasoekin. Euskara entzun nahi dugu zuen artean, ikusten dugunetik ikasten dugulako. Ez pentsa guk ikastolan euskaraz ikasi eta jolastearekin nahikoa denik. Zuek euskaraz egingo ez baduzue, euskara umeen gauza dela pentsatuko dugu, gure artekoa, eta guk handitan zuek bezalakoak izan nahi dugu. Zuek bezalakoak, baina euskaldunak, txo!

Bai, ama. Bai, aita, orain zure txanda da. Eman izena eta zoaz euskaltegira!

Baldin badakizu, erabili ezpainak. Eta ez badakizu, guk lagunduko dizugu. Animo eta ikasi! Maite zaitugulako, esaguzu euskaraz, emaguzu muxu.

Aupa zu! Eta aupa gu! Bihotza, burua, eskuak! Sentitu, pentsatu, ekin! Denok elkarrekin! Elkarrekin KORRIKA eta euskaraz! Gora Korrika eta Gora euskara!!!

EITBren bideoa

Ostegunean bertan, Korrikaren berri eman genizuen, gaur Jakinsaro mendizaleek euren blogan beste kronika hau egin digute eta hona ekartzen dizuegu egun horretan ateratako argazki eta bideoaz apainduta.

Jakinsaro taldeko mendizaleok Korrikarekin bat egin dugu antolatu diren ekintzetan. Larunbatean, plazan egon ginen materiala saltzen, epaile lanak egiten, bazkarian laguntzen, eta abar. Ostegunean korrika gure herritik pasatzen zela, kilometroa erosi genuen eta zozketan Jone eta Adurri egokitu zitzaien lekukoa eramatea. Eta nola eraman gainera! Eskerrak aurrean zihoan kotxeak abiadura handitu zuela.

Horretaz gain, gure euskararekiko konpromisoa ez dugu bertan utzi nahi eta hurrengo apirilaren 26rako Aiako Harrietara joateko antolatuta genuen txangoa maiatzaren 10erako atzeratu dugu. Egun horretan Herri Urrats ospatzen da Senperen eta joateko asmoa dugu. Plana honako hau izango da: Aurreikusia zegoen bezala, Aiako Harrietako Irumugarrietara joango gara eta gailurrean hamaiketakoa (ezinbestekoa) egin ondoren, autobusez Senperera abiatuko gara. Hemen norberak aukera dezake zer egin: zirkuitua, ekitaldiak ikusi, aintziran bainatu, poteoa…Bertan bazkaldu ondoren, bostak aldera autobusa hartuko dugu etxera bueltatzeko.

Uste dugu plan polita dela, eta bide batez (edo batez ere), Seaskako ikastolei laguntzeko aukera ematen digu. Ea akaineko irteerarako bezala bi autobus betetzen ditugun.

Bideoa

Argazkiak

1980an Oñatin hasi zen Korrikaren lehen edizio hura. Aurten, 16. edizioa dugu eta lehen edizio hartan atera ginenok urteen zama antzeman dugun arren, orduko ilusio berberarekin atera garela aitortu beharra dugu. Izan ere, belaunaldiz belaunaldi doan euskararen lekukoari eutsi nahi diogu eta hori agertzeko aukera dugun bakoitzean, hortxe gauzkate gure ahalegintxoa egiteko prest.

Izpiritu horrekin, gaur goizean, Jakintza Ikastolako komunitate osoa kalera irten gara korri egitera eta jende guztiari esateko: ONGI ETORRI EUSKARAZ BIZI NAHI DUGUNON HERRIARI!!!

Baina ez gara hitzetan edo esloganetan gelditzen diren horietakoak, ez horixe. Gure ikastolak 4 kilometro hartu ditu aurtengo edizioan: ikasleek bat erosi dute, langileek beste bat, Jakinsaro mendizale taldekoek hirugarrena eta Jakintza Ikastolak laugarrena. Horregatik, gaur goizean, gure herriko kaleetatik Jakintza Ikastolak egundoko protagonismoa izan du. Lerro hauetatik, gure esker eta zorionik beroenak eman nahi dizkizuegu guztion artean egindako ahalegina eta lanarengatik.

Jarraian, gaur goizean grabatutako irudiekin argitaratu dugun bideoarekin uzten zaituztegu. Ateratako argazkiak jaso bezain azkar jarriko ditugu.

Eguneraketa: Jada, argazki sorta bat jarrita dugu. Bideoaren azpian ikus ditzakezue.

Argazkiak

Datorren ostegunean, apirilaren 2an, iritsiko da Korrika Ordiziara, goizeko. Suhiltzaileek emango diote “Ongi etorria” Ordizian eta hauekin batera gure DBHko ikasle eta irakasleek ere.

Malkaskotik Joseba Rezola Pasealekuan barrena, eta Tren Geltokia igaro ondoren, Barrena Parkearen beheko sarreran Adur Iñigo eta Jone Galparsorok, HHko ikasleek hartuko dute lekukoa, Jakinsaro mendi taldearen izenean.

Hauek, HHko andereñoa den Mertxe Irazuri emango diote lekukoa, Azari Elkartearen parean. Mertxek lanak izago ditu aldapan gora, Olano tabernaraino Ikastolako langileen kilometroa betetzen. Baina bide erdian, Gudarien Etorbidean, Haur Hezkuntzako ikasle guztiak izango ditu animoak emateko.

Olano Tabernan, Juntakidea den Aitor Madrazok jasoko du lekukoa Jakintza Ikastolaren izenean, eta bertan, Arboledaren parean gehituko zaizko lasterketari Lehen Hezkuntzako 5 eta 6. mailakoak. Aitorrek Garagartza Plazaraino egingo du ibilbidea. Garagartzan Lehen Hezkuntzako 3 eta 4. mailakoak sartuko dira tropelean. Hauek aldapan behera Geltokira iritsi eta Poligonoko bidea hartuko dute. Hemen, sarreran, Lehen Hezkuntzako 1 eta 2. mailako ikasleak sartuko dira korrika egitera.

Poligonoari buelta eman eta gero, Montañitan, Maddi Otamendik hartuko du lekukoa, Jakintzako ikasleen izenean eta Oianguren Institutoko bidegurutzean utziko du Ordizia eta Zaldibiako Gaztetxeen izenean hartuko duen gaztearen eskuetan.

Ordizia pasa ondoren Korrikak Itsasondoko bidea hartuko du.

Ibilbidea hobeto ikusteko, bideoa ikus dezakezu edo Korrikak Ordizian egingo duen ibilbidearen fitxategia jaitsi Google Earth tresnarekin ikusteko.

Ordiziako Korrika Batzordeak Korrikaren 16. edizioari Ongi Etorri esateko eta herria girotzeko era askotako ekitaldiak antolatu ditu.

Larunbatean, patata tortila lehiaketa ospatu zen eta gure ikastolako ikasle eta gurasoen protagonismoa nabaria izan zen. Txalo handi bat guztiek merezi badute ere, aipamen berezia gure DBHko ikaslea den Karim-entzat, oso tortila goxoa prestatu baitzuen (gatza erabili zuen bakarra).

Lehiaketaren ostean, bazkaria ospatu zen eta azpimarratzekoa da bertan bizi zen giro alaia Burrunbazale txarangako kideen musikaz alaiturik.

Baina eguna ez zen hor amaitu. Umeentzat antolaturiko jolasetan ere oso handia izan zen gure ikasleen partaidetza eta oso arratsalde polita bizi izan zuten.

Amaitzeko, datorren ostegunean, Korrika Ordiziara goizeko 9:30ak aldera iritsiko dela gogorarazi nahi dizuegu eta guztion partaidetza eskatu nahi dugu. Jakintzako guraso, ikasle eta irakasleak bertan izango gara, zu?

Tortila lehiaketan eta bazkarian argazki sorta bat atera genuen eta jarraian jartzen dizkizuegu.

Datorren ostegunean, apirilaren 2an, goizeko 09:30etan, iritsiko da Korrikaren 16. edizioa gure herrira. Egun horretan, Korrikak egin duen ibilbidea Google Earth erabiliz grabatu eta “helikoptero birtuala” hartuz hegaldi zoragarria burutu dugu.

Grabatu dugun hegaldi birtual horren fitxategia nahi baduzu, aldameneko estekatik jaitsi ahal izango duzu: Korrika 16 Ordizian

Bideo formatuan ere grabatu dugu eta hortxe duzue emaitza.

Iragarrita zegoen bezala, gaur arratsaldeko 17:30ean hasi da Tuteran Korrikaren 16. edizioa. Inoizko korrikarik luzeena izango da aurtengoa, 2.503 kilometro beteko baititu Gasteizko Ama Zuriaren plazara iristean.

Irteera ETBko 2. katetik zuzenean ikusteko parada izan dugunok, harrituta gelditu gara Tuterako karriketan bildutako jendetza ikusita. Zalantzarik gabe, Tuterakoa, edizio honetarako aurreikusten dugun arrakastaren isla izan daiteke eta horrela espero dugu. Korrikaren gunean, oraintxe bertan argitaratu dute hasiera ekitaldiari buruzko albistea.

Korrika jarraitu nahi baduzue, antolatzaileek era guztietako baliabideek erabiliko dituzte eguneroko kronika, irudiak, bideoak… argitaratzeko eta, dagoeneko, ekimen ezberdinak abian jarri dituzte gizartea informatzeko. Horra hor garrantzitsuenak:

• Bideoak: Euskaltuben kanala ireki dute
• Argazkiak: Flickr-en eguneroko argazkiak jartzen joango dira
• Twitter: Jarraipena egingo dute erabiltzaileek #korrika etiketa jarrita
• EITB3: Korrikaren jarraipena egingo du ETB3 kateak
• Korrikaren web orria

Tuterako argazki sorta bat dagoeneko jarrita dago sarean eta hemen behean jarri dizkizuegu. Bideorik oraindik ez dugu lortu eta EITBko web orrian ikusi dugun albistea jartzearekin konformatuko gara oraingoz.

Eguneraketa: Jada, bideo bat lortu dugu eta hementxe bertan jartzen dizuegu.

Gaur, arratsaldeko 17:30ean, Tuteratik abiatuko da Euskal Herri osoa, 11 egunez eta gauez, zeharkatuko duen euskararen aldeko lasterketa herrikoia. Korrika 16ren ibilbidea.

Gure ikastolak garrantzia handia ematen dio egitasmo honi eta gure web orri honetan asko dira egin ditugun aipamenak.

Gaurko mezu honekin, gure ikastolak Korrikarekin bat egiten duela garbi adierazi nahi dugu. Eta euskararen lasterketa horretan alaitasuna nagusi izan dadin, horra hor edizio honetarako atera den kantaren bideoa.

Apirilaren 2an, osteguna, pasako da Korrika Ordiziatik, 09:30etik 10:00etara bitartean, eta Korrikaren ailegaera girotzeko hainbat ekitaldi prestatu ditu Ordiziako Korrika Batzordeak larunbaterako eta datorren asterako.

Egitaraua

Martxoaren 28an, larunbata, “Korrika girotze eguna”:

• 12:00: patata-tortilla lehiaketa Enparantza Nagusian (mahai-futbola eta girotzeko musika izango da bertan. Baita Korrika materiala salgai ere). Ondoren pintxo dastaketa.
• 14:30: Korrika bazkaria Enparantza Nagusian Burrunbazaleak taldeak alaituta. Ondoren patata-tortilla lehiaketako sari banaketa.
• 16:30: Buruhandiak, umeentzako jokoak… OGA-ren eskutik
• 18:30: “La Tirili” taldearen eskutik “gertakizuna” kale animazioa herri-gunean (Ordiziako Udalak lagunduta).

Martxoaren 31n: “film laburren emanaldia”, asteartea, arratsaldeko 7etan.

Martxoaren 22tik 27ra bitarteko astean: Korrika dokumentala Jakintza Ikastola nahiz Oianguren Institutuan.

Bazkarirako txartelak salgai

Korrikaren aldeko bazkaria egingo dute Plaza Nagusian, 14:30ean. Batzordeko kideek gogoratu dute Oianguren institutuan, Jakintza ikastolan, Urdin tabernan eta AEK euskaltegiaren egoitzan daudela txartelak salgai, 6 euroan. Bazkaria girotzen Burrunbazale txaranga ariko da. Ordiziako Gazte Asanbladak antolatuta umeentzako jokoak eta buruhandiak izango dira 16:30ean, eta 18:30ean, Ordiziako Udalak diruz lagundutako La Tirili taldearen Gertakizuna kale animazioa izango da. Datorren asteartean, hilak 31, film laburren emanaldia izango da Herri Antzokian, 19:00etan.

Badator Korrika 16! Apirilaren 2an sartuko da karrera Goierrin eta betiko legez afaria antolatu du Korrika Batzordeak. Hitzordua martxoaren 27an izango da, iluntzeko 8:30ean, Beasainen. Arratsaldean sukaldaritza lehiaketa izango da eta elkarteentzako izen-ematea zabalik dago oraindik.

Afarirako txartelak ohiko lekuetan izango dira salgai. Azken egunera arte ez itxarotea eskatzen da.