JAKINTZA IKASTOLA ORDIZIA » hizkuntza

Jakintza.net eleanitza bihurtu dugu

jakintza ikastola — Tue, 18 May 2010 13:37:06 +0000

Aurreko astean, Google Translate zerbitzuak Euskara bere hizkuntzen zerrendan sartu zuela jakin genuenean, gure web orrira zerbitzu hori ekartzea erabaki genuen.

Egun hauetan aukera ezberdinekin frogak egin ostean, gaur Teketen blogariak argitaratu duen aukera oso sinplea eta eraginkorra iruditu zaigunez, horixe bera ezartzea erabaki dugu. Irudian ikus daitekeen bezala (klikatu handiagoa ikusteko), edo mezu bakoitzaren goialdean begiratu, hizkuntza batzuk zuzenean agertzen zaizkigu, baina beste bat nahiko bagenu, “plus” ikurra klikatu beharko genuke eta agertuko litzaigukeen orrian, nahi genukeen hizkuntza hautatuko genuke.

Egia esan, zerbitzuak eskaintzen dituen itzulpenen kalitatea oraindik oso eskasa da “Alpha fasean” baitago eta bide luze bat du beste hizkuntzetan eskaintzen dituen kalitatezko emaitzak itzultzeko. Hala ere, ziur gaude, epe laburrean edo ertainean, oso bestelakoa izango dela gure hizkuntzari egingo dizkion itzulpenen kalitatea.

Hizkuntza erabilera handitzeko ikastaroak hezitzaile eta gurasoentzat

jakintza ikastola — Fri, 11 Dec 2009 18:44:50 +0000

Goierriko Hitzan beheko albistea irakurri dugu eta bere interesa dela bide, hona dakarkizuegu oso osorik.

Ordiziako Udaleko Euskara Zerbitzuak haurren hezitzaileei eta gurasoei begira ikastaro sorta antolatu du. Aurrenekoa abenduaren hondarrean izango da, eta gainontzeko laurak datorren urtean. Ikastaroen edukia eta datak finkatu dituzte dagoeneko.

Aurreko bi urteetan Hezitzaileek asko egin dezakete eta Euskararen sustapena udaleku irekietan izeneko ikastaroak antolatu ditu Euskara Zerbitzuak, baina ikastaro eskaintza handitzeko eskatu diete teknikariei herriko hainbat begiralek, eta horregatik zehaztu dituzte datorren urteari begirakoak. «Hezitzaileei ez ezik gurasoei ere egin nahi diegu eskaintza, bai batzuen bai besteen prestakuntza eta borondatea giltzarria iruditzen baitzaigu hizkuntza ondorengoetaratzeko garaian», arrazoitu du Belen Maiza zinegotziak.

Abenduan da aurrenekoa

Abenduaren 28, 29 eta 30ean Hizkuntza erabilera handitzeko motibazio estrategiak eta tresnak izeneko ikastaroa egingo dute. Abenduaren 18rako eman behar da izena Euskara Zerbitzuan, hamar euro ordainduta. Ikasleek eta langabetuek bost euro ordaindu beharko dituzte . Taldea osatzeko gutxienez zortzi lagunek eman behar dute izena, eta gehienez 20 ikasle onartuko dituzte.

Haurrekin eta gazteekin aisialdian nahiz kirolean aritzen diren hezitzaileentzat antolatu dute ikastaroa, haien jardueretan euskararen erabilera handitzeko motibazio estrategiak ikas ditzaten. Ikastaroa bederatzi ordukoa da, eta Barrenan emango dute, goizez, 10:30etik 13:00etara.

Hurrengoen aurrerapena

Datorren urterako beste lau ikastaro antolatu dituzte. Haur Hezkuntzako eta Lehen Hezkuntzako irakasle, haur eskolako hezitzaile, udaleku irekietako begirale eta hezitzaile, dinamizatzaile soziokultural eta gurasoei begirakoak dira, oro har, ikastaroak, nahiz eta ikastaro bakoitza talde jakin batzuei zuzendutakoa izan.

Ikastaro horiek guztiak EBPN Euskara Biziberritzeko Plan Nagusiaren barruko ekimen modura antolatu ditu Euskara Zerbitzuak.

2010eko ikastaroak

Otsaila. ‘0-5 urteko haurren jolasak eta abestiak’.

Apirila. ‘Aisialdian euskararen erabilera sustatzeko programak’.

Maiatza. ‘Euskal jolasak’.

Urria. ‘Hizkuntza jolasak’.

Iturria: Goierriko Hitza

Ikastolen Hizkuntz Proiektua

jakintza ikastola — Mon, 06 Jul 2009 21:18:02 +0000

Duela hilabete batzuk, Ikastolen Elkarteak ekoiztutako Ikastolen Hizkuntz Proiektuaren aurkezpena burutu zen. Gaur, Proiektu osoa zuen esku jartzen dugu eta horrekin erantsitako gainontzeko dokumentu guztiak.

Hau guztia zertaz doan hobeto ulertzeko, horra hor liburuaren sarreran aipatzen dena:

XXI. mendearen lehen hamarkada hauetan, heziketa-lana tokian tokiko eta garaian garaiko testuinguruan ongi kokatu nahi duen eskolak bere planteamenduak eguneratu behar ditu, gizartean gertatzen ari diren aldaketa sakonei era eraginkorrean erantzun nahi badie.

Aldaketa horien artean, hizkuntzarekin zerikusia duten prozesuek berebiziko garrantzia hartzen dute ikastolontzat eta euskal eskolarentzat, oro har.
Euskararen indarberritzea dugu ardura nagusi, eta, horrekin uztartuz, globalizazioaren gizarte eleaniztunean bizitzeko prestatu behar ditugu etorkizuneko euskal herritarrak. Horrenbestez, euskaran eta euskalduntasunean ardaztutako hezkuntza eleaniztunerako eredua garatu behar dugu.

Bide horretan, 2000. urtean ikastola-sareak tresna berri baten beharra ikusi zuen; hain zuzen ere, ordura arte hizkuntzen inguruan sortutako proiektu guztiak uztartuko zituen tresna bat, eta hizkuntza guztien tratamenduari koherentzia emango ziona eskola barruko eremu askotarikoetan. Tresna horri Hizkuntz Proiektua deitu zitzaion,
eta haren markoa garatzeko hainbat eremutako adituen talde teknikoa izendatu zen. Behin marko hori idatzita (Ikastolen Hizkuntz Proiektua definitzen, 2002) Ikastola bakoitzak bere Hizkuntz Proiektua garatu zezan saio pilotua martxan jarri zen hainbat ikastolarekin: ingurune soziolinguistiko eta tamaina desberdinetakoekin, eta hizkuntzak eskuratzeko edo erabilera indartzeko egitasmoetan eskarmentu desberdina zuten ikastolekin. Urtez urte egitasmoarekin bat egiten joan dira ikastolak, eta 2008an hogeita hamasei ikastolako taldea izatera iritsi da. Hemen eskaintzen den liburu hau da hasierako taldearen hausnarketari esker, eta ikastola aitzindarien lanari esker, garatu den ibilbidearen emaitza.

Dokumentu hau idazten ari garen unean, ikastolen kolektiboa XXI. mendearen eskakizunetara egokitutako “Ikastola-eredua” definitzeko prozesuan dago1. Hau da, ikastola guztiak batzen gaituzten oinarrizko hezkuntza eta eraketa-ezaugarri komunak erabakitzen ari gara. Erabaki horien artean, ezinbestean, zera dago: ikastola guztiek gutxienez bete beharreko oinarrizko hizkuntz plangintza. Alabaina, eskuartean duzun liburua gutxieneko plangintza hori baino haratago doa; esan bezala, 90eko hamarkadatik aurrera Ikastolen Elkartea garatzen eta bultzatzen ari den euskaran ardaztutako eleaniztasunerako proposamen osatua biltzen du liburuak, eta hori aholkatzen zaie ikastolei helmuga gisa.

Egitasmo honen emaitza gizarteratzeko garaian, hau da, Ikastolen Hizkuntz Proiektua argitaratzerakoan, bi ataletan bereizi da liburua: lehenengoa, Ikastolen Hizkuntz Proiektuaren erreferentzia-markoa deritzona; bigarrena, Hizkuntz Proiektua garatzeko gida izeneko atala, eranskin bilduma zabal batekin batera eskaintzen dena.

Ikastolen Hizkuntz Proiektuaren erreferentziamarkoa atalean, izenburuak dioen bezala, Ikastolen Hizkuntz Proiektuaren erreferentzia-eredua eskaini nahi da. Hau da, Hizkuntz Proiektuaren kontzeptua bera azaltzeaz gain, ikastolok Hizkuntz Proiektua garatzeko ardatz gisa hartu ditugun oinarri teorikoak aipatzen dira. Oinarri horiek, izan ere, ikastola gisa definitzen gaituzten ezaugarri bereizgarrien araberakoak dira.

Bigarren atalak, Hizkuntz Proiektua garatzeko gida izenekoak, erreferentziamarko horren zehaztapen praktikoa izan nahi du. Jarraibide zehatzak eskaintzen ditu ikastola bakoitzak, bere testuinguruari eta ezaugarri bereziei erantzunez, bere Hizkuntz Proiektua sor dezan.

Liburu honen erabilera malgua izan daiteke, irakurlearen helburuaren baitan atal batetik edo bestetik hasteko; atal batera edo bestera bakarrik jotzeko aukera ere badago. Hartzaile bakoitzaren beharrei erantzungo dion malgutasun hori ahalbideratzeko, Hizkuntz Proiektua garatzeko gida izeneko atal praktikoaren esparru bakoitzak lotura zuzena izango du marko teorikoan dagokion azalpenarekin; horrela, bakoitzak bere interesen arabera jasoko ditu erreferentzia teorikoak.

Hizkuntz Proiektua jaitsi:

Ikastolen Hizkuntz Proiektua (PDF 1,8 MB)

Hizkuntz Proiektua ikusi:

Irudiaren gainean klikatu.

Dokumentazio osagarria

Plangintzarako tresnak:

Diagnosirako tresnak

Emaitzen hustuketarako bitartekoak

Material hauek guztiak argitaratu ahal izateko, egileek ezarritako baimena errespetatu dugu:

Aitortu. Lanaren kredituak aitortu behar dituzu, egileak edo baimenduak zehaztutako eran. Ez merkataritzarako. Ezin duzu lan hau merkataritza xedetarako erabili. Partekatu baimen beraren arabera. Lan hau aldatzen baldin baduzu, edo lan eratorri bat sortzen baduzu, sortutako lana bana dezakezu soil-soilik baimen honen berdi-berdineko baten mende.

Euskara 21

jakintza ikastola — Thu, 29 Jan 2009 15:10:05 +0000

Euskara 21 ekimenak “Oinarrizko Txostena” (PDF 532 Kb) du abiapuntu. Dokumentu honen egileak euskal kultura eta gizarteko pertsona kualifikatuak dira. Partaidetzarako tresna bat da Euskara 21, guztion ekarpenekin XXI. mende hasierako hizkuntza politikaren oinarriak finkatzeko aukera emango diguna. Atzeraelikatzea, bizitasuna eta aniztasuna ezaugarri dituen prozesu honen bitartez, euskararen inguruan iritzia adierazi dutenekin harremanetan jardun ahal izango duzu, besteen iruzkinak irakurriz eta zeureak gune honetara ekarriz.: Euskara21

Dokumentua ikusteko, klikatu azpiko irudian.

Euskara 21 cuenta como punto de partida con el documento “Ponencia Base”. Los autores de este documento son destacadas personalidades de los diferentes ámbitos de la cultura y la sociedad vasca. Euskara 21 es la herramienta con la que esperamos esbozar entre todos la política lingüística para los inicios del siglo XXI a través de un proceso de retroalimentación, dinámico y plural donde podrás leer, opinar y dialogar con todas las personas que participan mediante su opinión acerca del euskera.

Si queréis ver el documento, haced clic sobre la imagen inferior.