Berandu xamar eta kostata, baina hemen dituzue Jakintza Ikastolako txikienek egin zuten “Udaberriko Festa”ren bideoak.

Goza itzazue.

Villa Eugenian atzo ospatu genuen gure Udaberriko Festa berezia. Bertan ikastolako txikienek parte hartzen dute, inor falta gabe, 2 urtekoekin hasi eta 5 urteko haurrekin amaituz. Honen helburua, primeran pasatzea.

Atzokoa ez zen salbuespena izan. Haurrek primeran pasa zuten haien dantzak guraso, anai-arreba, aiton-amona, izeba-osaba eta lehengusuen aurrean aurkeztuz. Ikusleek ere emanaldiaz gozatu izana espero dugu.

Saioak denetik izan zuen. 5 urteko Urtzi eta Olaiak egin zituzten aurkezle lanak eta hauexek izan ziren emanaldiari hasiera eman ziotenak, 2 urtekoen “TXARANGA” aurkeztuz. Hauen atzetik, 4 urteko hippiak zetozen euren “A YAMI, YAMI” abestia dantzatuz. A zer nolako ipurdikoak hartu zituzten! Ondoren, 5 urtekoak sartu ziren euren “HARRI KOXKORRAK” kolpatuz. Jadanik nahikoa dantza eginik geunden baina ziurrenik ikusleek bazuten oraindik zerbait gehiago ikusteko gogoa. Guk ezin genituen horrela utzi eta 3 urtekoak atera ziren pijamak, txanoak eta hostoak jantzita, baita aterkiak hartuta ere. “JAIKI HADI MUTIL” abestia eskaini zuten, berriro ere 5 urtekoei lekua utziz. Oraingoan “ORKESTRA” bihurturik sartu ziren. Azken hauen soinuak zenbait animalia erakarri zituen, tximuak, lehoiak jirafak eta elefanteak. Hauekin batera mendizale batzuk ere inguratu ziren gurera, gainera ez zuten euskaraz hitz egiten, ingelesez baizik. Pentsa noraino iritsi ziren gure festako doinuak! Emanaldiaren bukaera gertu zen jada baina 5 urtekoek azken dantza bat eskaini nahi izan zuten. Azkenik, festari amaiera emateko, 4 eta 5 urtekoek kalejira bat dantzatu zuten elkarrekin.

Lehen esan bezala, espero dugu Villa Eugeniara inguratu zirenek arratsalde ederra pasa izana eta bertaratu ez zirenen artean bazaude, hemen duzu argazki sorta, ikusi ahal izateko.

Urtero legez, udaberria iritsi da eta martxan jarri dugu gure baratza.

Aurten ere zenbait guraso izan dira gure lur zatitxoa prestatzen, 3, 4 eta 5 urteko haurrek haien letxugak landatu ditzaten. Mila esker zuei.

Egunetan zehar letxugak ureztatuko dituzte eta pixkanaka nola handitzen diren ikusiko dute gure haurtxoek, etxera eramateko eguna iritsi arte. Marrubi landareren bat edo beste ere landatu dute, hauek nola irteten diren ikusteko.

Gure baratza irekita izango duzue ikustera pasa nahi duzuen guztientzat. Etorri ezin duzuenentzat, hemen duzue atera dugun argazki sorta. Hala ere, adi egon, argazki gehiago ere jarrito ditugu eta.

Eguraldiak bat ere lagundu ez duen arren, urtero bezala, euskal inauteriak Ordiziara iritsi dira Jakintza Ikastolaren eskutik. Hotzak, elurrak, hezetasunak eta giro desatseginak ez dute lortu gure ikasleen animoa zapuztea eta, azkenean, emanaldi politak eskaini dizkigute bai Haur Hezkuntzako ikasleek baita Lehen Hezkuntzakoek eta DBH 1ekoek ere.

Lehen Hezkuntzako ikasleak Beti Alai frontoian aritu dira eta Haur Hezkuntzakoak Villa Eugeniako barruko jolastokian. DBH 1eko ikasleen Akelarrea, berriz, bi emanaldietan ikusteko aukera izan dugu.

Zakuzaharrak, Miel-Otxin, Sorginak, Txorimaloak, Kotilungorriak, Baserritarrak, Iñudeak eta artzainak, Luzaideko bolantak, Txori-izugarriak, Abaltzisketako txantxoak, Joaldunak… denak bikain aritu dira eta bildutako ikusleen errekonozimendua jaso dute txalo zaparrada beroen bitartez. Gure ikasleen ahalegina eta ilusioa ez zen gutxiagorako. Zorionak guztiei!!!

Grabatutako bideo eta argazkiekin uzten zaituztegu.

Bideoa:

Bideo hau Full HD kalitatean ekoiztu eta igo dugunez, kalitate osoz ikusteko, “Play” botoia sakatu eta gero, erreproduzigailuaren barraren eskuinaldean “360p” agertzen dela ikusiko duzue. Bada, sagua bere gainean jartzerakoan, beste aukera batzuk agertzen direla ikusiko duzue. Zenbakia zenbat eta altuagoa orduan eta kalitate hobea. Hori bai, bideoa kargatzeko ere zenbat eta kalitate handiagoa orduan eta denbora gehiago bideoa kargatzeko. Konexio ona baduzue edo denbora baduzue, merezi duelakoan gaude. Pantaila osoan jarri eta gozatu!!!

Goierri Telebistak argitaratu duen bideoa:

Goierri Telebistaren web orrian argitaratu duten bideoa

Argazkiak:

Udazkenean gaudenez, urtaro honekin lotutako zenbait arlo lantzen dira: eguraldia, fruituak, arbolak, hostoak, perretxikoak…

Gai hau aprobetxatuz eta landu ondoren, 5 urtekoek euren erakusketa eratzeari ekin zioten. Guztien ahaleginari esker (gurasoak, ikasleak eta irakasleak) posible izaten da aurtengoa bezalako erakusketa ederra antolatzea.

Bisitari ugari izaten ditu eta noski, aurtengoa ez da salbuespena izan. Oso pozik gaude gure erakusketak izan duen arrakastarekin.

SEGI HORRELA! ZUEN SEME-ALABEK ESKERTUKO DIZUE ETA!

5 urteko haurren geletan esnekiak lantzen ari ginenez, aste honetan egin dugun jardueretako bat mamia egitea izan da. Hor doaz jarraitu genituen errezetaren pausoak:

- Hasieran esnea berotzen jarri genuen irakin arte.

- Ondoren, gelara eraman genuen epel puntua har zedin.
- Gero gatzagia bota.
- Azkenik, potetxotan hozten utzi genuen jateko prest egon arte.

Prestaketa lanak goizean eginik utzi genituenez, arratsaldean mami goxo hura jateari ekin genion. Haur guztiak ez ziren probatzera animatu, beste batzuk berriz, errepikatu egin zuten.

Esperientzia polita izan zen eta dibertigarria.

Jadanik sabela beterik, buruari eragiteko txanda zen. Aurretik emandako pausoak gogoratuz, mamia egiteko beharrezkoa den errezeta osatu behar zuten haurrek. Fitxa polit baten bidez egiten da hori eta marrazki ederrak ditu gainera. Haurrek ez zuten arazorik izan, mamia egiterakoan adi-adi eta interes handiz jarraitu baitzuten guztia.

Errezeta etxera eraman zutenez, espero dugu zuek, gurasoak, animatuko zaretela etxean ere postre goxo hau egiten eta dastatzen. Errezeta etxean ez duzuenok, aurretik jarri ditugun pausoak jarraitu eta ikusiko duzue zeinen mami ederra jango duzuen. ON EGIN!

Jarraian duzue argazki guztiak ikusi ahal izateko aurkezpena.

5 urteko haurrak garraioak lantzen ari direnez, bidaiatxo bat egitea erabaki zuten. Nola? Trenez.

Ikusten den bezala, Ordizian eman zioten hasiera. Ikastolan ohiko orduan elkartu eta 10:00ak aldera tren geltokira abiatu ziren. Trenera igo eta bidaia, euren helmugara iristeko irrikaz egin zuten. Argi zegoen oso pozik joan zirela.

Donostiara iritsi zirenean garraio gehiago ikusteko aukera izan zuten: autobusak, kotxeak, taxiak, motorrak, txirrinduak… Badakigu horiek guztiak hemen ikusteko aukera ere badutela baina badira garraio batzuk Ordizian ikusterik izango ez dituztenak, txalupak eta itsasontziak, adibidez. Asmo horrekin inguratu ziren Donostiako kaira eta a zer nolako sorpresa! Hantxe zeuden emakumeak sareak josten, hauek dituzten zuloak konpontzeko.

Udaletxe parean kanpamentua ezarri eta bazkari goxoa jan zuten. Gainera, tripa ongi bete eta negoziaketa txiki baten ondoren, Alderdi Ederreko zaldiko maldikoan ibiltzeko aukera izan zuten. Esan beharrik ez dago zein ongi pasatu zuten.

16:30etan Ordiziako tren geltokira iristeko denboraz, bueltako trena zintzo-zintzo hartu eta bakoitza bere esperientzia kontatzera amatxori, aitatxori, amonari, aitonari…

Bukatzeko, azpimarragarriena zera iruditu zaigu, guztiek izan zuten portaera. TXALO BERO BAT BERAIENTZAT.

Azpian duzuen aurkezpenean ikus ditzakezue argazki guztiak eta haurren aurpegi alaiak.

Egun hauetan dugun eguraldi aparta aprobetxatuz, 4 urteko haurrak kalera irten dira gure herria gehiago ezagutzera. Parkea, plaza eta beste zenbait txoko oso ongi ezagutzen dituzte, noski, baina orain lantzen ari diren gaia aitzaki, Ordiziako etxe ezberdinetan jarri dute haien begirada. Hau da, lehen egiten ziren etxe motak, orain egiten direnak, jauregiak, familia bakarreko etxeak, bizilagun ugarikoak… Guzti horiek arreta handiz jarraitu dituzte.

Herriko kaleetan paseotxo bat eman, etxeak ikusi eta Oteizaren eskulturari begirada bat emateko denbora ere izan dute. Leku hori bera aukeratu dute azpian ikusten duzuen argazkia ateratzeko.

Haurrak ederki ibili dira eta ziur haien irakasleak ere gustura egon direla.

Beste argazkiak ikusteko egin klik hemen edo honen azpiko aurkezpenean ikusi.

Badira zenbait urte Guraso Eskola ekimenaren barnean hitzaldi ziklo ezberdin antolatu izan direla Jakintza Ikastolan . Aurten ere esperientziari jarraipena eman nahi diogu, eta horretarako 2008-09 ikasturteko ekitaldiekin hasteko garaia iritsi zaigu.

Momentuz, HAUR HEZKUNTZAko gurasoekin hasi nahi dugu eta egingo diren bi saioen berri eman nahi dizuegu. Ohartxo honen bidez, bilera hauetarako gonbitea luzatuko dizuegu.

Datorren astelehenean eta asteazkenean, maiatzak 4 eta 6, Beatriz Ezeizak zuzenduko dituen hitzaldietan gure seme-alaben heziketak familia osoko harremanetan duen eragina aztertuko da. Jarraituko den gidoia honako hau izango da.

1. Bikoteak pasatzen dituen fase ezberdinak eta etapa bakoitzaren ezberdintasunak.
2. Gurasoen rola. Familia ikasi eta gozatzeko gunea.
3. Nola egiten dira familian lotura afektiboak eta bitzitzan zehar hauen eragina.
4. Komunikazio asertiboaren garrantzia familia barnean.
5. Babes errekurtsoak familian.

Data: Maiatzaren 4 eta 6an (astelehena eta asteazkena)
Ordua: 18:00etan
Tokia: Villa Eugenia
Gaia: Seme-alabaren heziketa eta familia
Norentzat: HHko gurasoentzat
Hizlaria: Beatriz Ezeiza

LA EDUCACIÓN DE NUESTROS HIJOS Y LA FAMILIA

Desde hace varios años la Ikastola Jakintza lleva impulsando diferentes actividades dentro de la Escuela de Padres. Durante el curso actual 2008-09 queremos continuar con dicha iniciativa y para ello es nuestra intención comenzar próximamente con dos reuniones dirigidas expresamente a los padres de EDUCACIÓN INFANTIL.

Por medio de esta nota queremos invitaros a las charlas que se celebrarán el próximo lunes y miércoles, días 4 y 6 de mayo, para todos los padres y madres de Infantil. Beatriz Ezeiza nos asesorará sobre la influencia que la educación de nuestros hijos tiene en las relaciones entre todos los integrantes de la familia. El esquema o guión será el siguiente:

1.- ¿Cómo funcionan las emociones y sentimientos en nuestros hijos?
2.- Desarrollo emocional del niño en sus primeros años de vida.
3.- Capacidades necesarias para el desarrollo emocional del niño.
4.- ¿Qué hacer ante dichas dificultades? Casos prácticos.

Fecha: 4 y 5 de mayo (lunes y miércoles)
Hora: 18:00
Lugar: Villa Eugenia
Tema: LA EDUCACIÓN DE NUESTROS HIJOS Y LA FAMILIA
Dirigido a: Padres y madres de Educación Infantil
Ponente: Beatriz Ezeiza

Ordizia Altzariak – Muebles Ordizia enpresak duen tailerrean izan dira gure 4 urteko haurrak. Urtxintxa proiektuaren lanketa burutzeko oso irteera aproposa izanik eta enpresako arduradunaren laguntza eta jarrera lagun izan ditugula, oso irteera interesgarria suertatu da gure 4 urteko ikasleentzat.

Egurra nola lantzen duten ikusteaz gain, altzari baten ekoizpen prozesua ezagutu eta bizi izan dute. Eskertzekoa da bertako langile eta arduradunek erakutsi duten jarrera eta gure ikasleen jakin-mina asetzeko eman dizkiguten azalpenak eta erakutsi duten gertutasuna. Mila esker!!!

Bertan ateratako argazki sortarekin uzten zaituztegu.