Batxilergoko ikasleen Kultur Astea euren curriculumaren eskakizunei oso lotuta izan bada ere, beti dago tarteren bat lan hori beste motako ekintzekin lotzeko. Eta horixe izan zen atzo goizean 1. mailako ikasleek burutu zutena.

Egin beharreko lanari behar bezala ekiteko, gosari bikain bat antolatuta zuten eta, diotenez, inoizko gosaririk osoenak eskatu zituzten: zukuak, kafesneak, kakaoak, urdaiazpiko ogitartekoak… Bapo bapo gosaldu ondoren, bilatu behar zutena zehazten hasi ziren; 1929ko aitona edo 1933ko amona… Batzuek ez zuten arbasorik Ordizian eta besteenekin konformatu beharrean izan ziren.

Azkenean, Bake Epaitegira joan eta Aitor hasi zitzaigun irakasle lanetan. Hark bai interesa piztu! Denek nahi zuten Aitorren lana eta horretarako zer ikasi behar den galdetu zioten. Galderaz josi dugu gizajoa eta esker beroenak eman behar dizkiogu hemendik, pazientzia guztia erabili baitzuen gurekin! Horrela ikasi genuen liburuetan bilatzen, nola apuntatzen den, zer gauza diren Bake Epaitegiko ardura…

Eskerrik asko Aitor!

Lortutako informazio guztiarekin zuhaitz genealogikoak egiten hasiko dira. Arbasoen zuhaitzak Genoom gunean egingo dituzte eta, etxean jasotako eta atzo lortutako informazioa erabiliz, 1900era inguratuko dira. Horra iritsitakoan, Elizbarrutiko Artxibo Historikoa erabili beharko dute.

Beno, ea lana atzoko eguna bezain borobila ateratzen zaien eta ikerketa historikoak egiteko beharrezkoak diren oinarrizko trebetasunak eskuratzen dituzten. Momentuz, atzoko argazki sortarekin uzten zaituztegu

ARGAZKIAK

Egun hauetan beste zereginetan aritu gara eta gure Batxilergoko ikasleek eta Euskara irakasten duen irakasleak eginiko ekarpen bikain berria ohartu gabe pasatu egin zaigu. Ez dugu barkamenik.

Euskaljakintza proiektuaren arduraduna eta sustatzailea den Maite irakasleak gure ikastolako IKTeroak blogean eginiko azken ekarpenaren berri eman du eta, beti bezala, oso interesgarria eta aberatsa iruditu zaigu. Horregatik, handik hona ekartzea erabaki dugu ahalik eta zabalkunderik handiena izan dezan.

Hizkuntzaren gramatikaren alorra lantzeko, ohikoa izaten da ikasleek jarduera liburuetatik ateratako ariketak osatzea eta, jarraian, irakaslearen laguntzaz zuzentzea. Bada, ikasleek era ekinkorragoan aritzeko, zuetako batzuek jakingo duzuen bezala, euskaljakintzan prozesua irauli dugu ikasleak jarduera hauen diseinatzaile eta sortzaile bihurtuz. Honela, ikasleek jarduera ezberdinak sortzeaz gain, horientzako erantzunak ere aurkitu behar dituzte, prozesu osoan parte hartuz. Aprendizaia askoz ere esanguratsuagoa bihurtzen da, zalantzarik gabe. Ikasleak jarduera horiek sortzen ari diren bitartean, nik prozesua gainbegiratu eta, bukatzean, behin-betiko zuzenketak egiten ditut. Ondoren, sortutako jarduerak aplikazio batera (kasu honetan Hot Potatoes-era) pasatzen ditugu eta, azkenik, sarean denon eskura ipintzen ditugu.

Nire ustez, bai prozesu osoa eta bai emaitza aberatsak dira oso; izan ere, bikote bakoitzak bikotekideen artean sortutako jarduerak egiteko aukera du, eta baita beste guztienak ere.

Era berean, behin baino gehiagotan adierazi izan dugun legez, paperean egindako jarduerekin alderatuz gero, jarduera-sortzaileekin egindako ariketek bi abantaila nagusi dituzte:

• Saiakuntza bakoitzean, hurrenkera ausazkoa da. Hau da, ordenagailuan ariketa kargatzen den bakoitzean, ariketaren hurrenkera aldatu egiten da eta, horrela, behin eta berriz saia gaitezke jarduera menperatu arte.
• Erantzuna zein azalpenak bat-batean lor ditzakegu, balio erantsi handia emanez lanketari.

Guretzat aberasgarria izateaz gain, pozgarria ere bada ikustea egunetik egunera euskara ikasten ari den ikasle asko eta askori baliagarri gertatzen zaizkiola gure ariketak. Gauzak horrela, euskaljakintza 5ekook sortu ditugun lehenak hementxe uzten dizkizuegu. Oraingo hauek Euskaltzaindiaren arauak ikasi eta errepasatzeko jarduerak dira, eta gure ikastaroa (euskaljakintza arauak) osatzera datoz (hemen ipintzeaz gain, ikastaroko gunean ere txertatu ditugu).

Euskaltzaindiaren arauak orokorrean lantzeko ariketak

1	2	3	4	5	6	7
8	9	10	11	12	13	Ikastaro osoa

Ariketa zehatzak

Nornahi, nonahi…	Bat-batean…	Orduak nola esan	Hitz-elkartuak
Data nola adierazi	Baitu, baikara…	Aurrealde edo aurreko alde	Zenbait aditzen erregimena
Zenbakiak	Arazi	Munduko estatu-izenak eta herritarrak
Diptongoz bukatzen diren izenen deklinabidea		Ordinalen eta banatzaileen idazkera

Eusko Jaurlaritzako Hezkuntza Sailak Derrigorrezko Bigarren Hezkuntzako 2. Zikloko eta Batxilergoko ikasleentzat atzerrian alemana, frantsesa eta ingelesa ikasteko kurtsoetarako plazen deialdia kaleratu du.

Laguntza hori eskatzeko aginduan adierazitako ondorengo baldintzak bete behar dira:

a) 2008-2009 ikasturteko beken deialdi orokorreko beka-onuraduna izatea. Plazak betetzen ez badira bekadun ikasleekin, bekadun ez direnek ere, lurralde eta txanda bakoitzean geratu diren plaza horiek betetzeko aukera izango dute, baldin eta gainontzeko baldintzak betetzen badituzte eta puntuaziorik handienak atera badituzte.

b) Hezkuntza, Unibertsitate eta Ikerketa Sailak aurreko urteetan atzerrian ikastaroak egiteko deitu dituen plazen onuradun ez izatea.

c) Eskatutako plazari dago(z)kion hizkuntza(k) 2007/2008 eta 2008/2009 ikasturteetan ikasi izana, azkeneko hau Autonomi Erkidegoko Bigarren Hezkuntzako ikastetxe batean.

d) Eskatutako hizkuntzan gutxienez 6ko puntuazioa izatea, eta gutxienez 15eko puntuazioa izatea nota hau eta 2008/2009 ikasturteko batazbesteko nota batuta.

e) 2010. urtean 19 urte betetzea, gehienez.

Internet bidez bete beharko du eskatzaile bakoitzak bere eskaria (http://www.hezkuntza.ejgv.euskadi.net edo www.ikasle.net helbidean BEKAK, UNIBERTSITATEZ KANPOKO IKASLEAK atalean) eta ikastetxean entregatu aita, ama edo legezko tutoreak izenpetuta eta NAN edo pasaportearen kopiarekin batera.

Eskaera aurkezteko epea azaroaren 30ean amaituko da. Interesaturik zaudetenok zuen eskaera ikastolako administrazio bulegoan (Altamira auzoan) aurkeztu behar duzue.

Irakasleok dagoeneko ikasturte berriari hasiera eman badiogu ere gure ikasleek oporretako azken egunak aprobetxatzen hasi dira. Laster eman diogu hasiera ikasturte berriari, hain zuzen ere, hauek izango dira aurkezpen egunen data eta ordutegiak:

• Irailaren 5ean, DBHko aurkezpena egingo dute 11:00etan San Inazion.
• Astelehenean, hilak 8, Haur Hezkuntzako aurkezpena egingo dute Villa Eugenian eta Lehen Hezkuntzakoa San Inazion, 09:00etatik 12:30era.
• Irailaren 11n DBHOko aurkezpena egingo dute 11:00etan.

Fechas de comienzo del nuevo curso:

• El 5 de septiembre, a las 11:00 de la mañana presentación para alumn@s de ESO
• Lunes, 8 de septiembre, de 09:00 de 12:30 de la mañana en Villa Eugenia para Educación Infantil y en San Ignacio para Educación Primaria.
• Jueves, 11 de septiembre, a las 11:00 de la mañana presentación para alumn@s de Bachillerato.