JAKINTZA IKASTOLA ORDIZIA

Hechora goaz!!! (eta 2)

jakintza ikastola — Sat, 20 Jun 2009 13:20:00 +0000

Azken albistegietan ikusitako iruzkinen arabera, Pirineotara joateko zalantza gutxi izango duzuen irudi arren, zerbait jartzea pentsatu dugu, zenbait gauza gogorarazteko.
Ostiralean, 26an arboledatik aterako gara eta denok 17:30etan egon behar dugu bertan. 6ak baino lehen atera behar dugu. Afaria bi txandatan egin behar da eta ez dugu denbora asko luzatu behar. Hurrengo goizean badakizue goiz altxatu behar dugula.

Taldeak eginda daude eta autobusean banatuko ditugu . Hiru ordutako bidaian norbaitek aldaketak egin nahi baditu denbora soberan dauka egiteko. 110 pertsona gara eta kanpinera ailegatzen garenean dena erabat antolatuta egon behar da gauzak ez nahasteko: giltzak banatu, trasteak utzi eta afaltzera.

Gauzak eramateko garaian, zalantzak omen daude eta batzuk ere galdezka etorri zarete. Hona hemen aholku batzuk:

Bi egunetan mendian bertan bazkalduko dugu eta bakoitzak bere janaria eraman behar du. Ogia kanpinetik hartuko dugu eta denda txiki bat badute ere zenbait gauza erosteko: ura, latak, hestebeteak, txokolatea, gailetak.…Gainera, kanpina herrian bertan dago eta erosteko aukera ere egongo da. Hala ere, hobe etxetik eramaten badugu.

Gosariak eta afariak kanpinean egingo ditugu. Lo-zakuak ez dira eraman behar. Bungalowetan izarak eta mantak daude eta baita toallak, gela eta xanpu txikiak ere. Mendiko eguraldia aldakorra denez, babes-arropa eraman behar da (txanoak, eskularruak, zirak, e.a.). Ibilbidean ur gutxi aurkituko dugu, beraz kantinploraz ondo hornitu. Iaz arazoak izan genituen urarekin eta berriro kale ez egiteko eraman gutxienez litroa pertsonako. Hobe da pisu gehiago eramatea egarria pasatzea baino. Ibilbidean zehar errekatxoak aurkituko ditugu eta ura ona izaten da, hala ere, ez dira iturri seguruak. Botak, zapatilak, txanglak, eguzkitako kremak, kapelak, bainujantzia, toalla (kanpinean igerilekua dago eta ausartak lakuetan ere sar daitezke).

Laburrean:

Irteera: ostiralean, 26an, arratsaldeko 17:30etan Arboledan.
Buelta: igandean, 28an, gaueko 9ak aldera Arboledan.

Larunbatean Acherito lakura joango gara eta hemendik, nahi duena, Larraillera (2147). Txango hau luzatu zaigu autobusak guk nahi genuen tokian ezin duelako buelta eman. Meategiaren etxetik irten beharrean, Selva de Ozatik hasiko gara ibilbidearen joan-etorriari 6/7 kilometro gehiago emanez.
Igandean Lizara-Valle de los Sarrios-Estanes lakua-Somport zeharkaldia. Honi berriz, bestea konpentsatzeko 5/6 kilometro murriztu diogu.

Bi irteera horiek eguraldi ona badugu egingo ditugu, bestela alternatiba bezala, beste ibilbidea prestatu dugu: Siresa eta Selva de Ozaren artean dagoen “Boca del Infierno”.

Zalantzaren bat edota iradokizunak egin nahi badituzue iruzkina bidali eta erantzungo dizuegu. Ostirala arte beraz!

Iturria: Jakinsaro

Sastarrain, azken eguna

jakintza ikastola — Wed, 17 Jun 2009 23:27:35 +0000

Bi egun luze igaro ondoren, Sastarraini agur esateko eguna iritsi zaigu eta egun hauetan ezkutatuta izan dugun eguzkia ere agur esatera etorri zaigu.

Oso egun interesgarria izan da eta talde bakoitzari falta zitzaizkion ekintzak burutu, norberaren maleta berriro egin, ingurunea txukun utzi, bazkaldu, Portugaletetik iritsi diren lagun berriekin hitz egin, autobusa hartu eta Ordizian zain zeuden gurasoen galdera zaparradari aurre egin… Zein gogorra den umea izatea!!!

Egun hauetan bizi izandako guztia biltzen eta zuenganatzen ahalegindu gara, baina gauza bat ahaztu egin zaigu: gurasoen aurpegiak euren seme-alabak autobusetik irribarre gozo batekin jaitsi diren unean. Lastima!!!

Nolanahi ere, gaur grabatu ditugun bi bideo eta argazki bilduma jartzen dizkizuegu. Datorren ikasturtean, gehiago izango dugu. Bitartean, oporrak ongi igaro!

Bideoa: oilategi eta ukuilua

Bideoa: zalditegia

Gaurko argazkiak

Sastarrain, 2. eguneko kronika

jakintza ikastola — Tue, 16 Jun 2009 22:38:46 +0000

Atzoko eguraldi tristearen ondoren, eguna argiagoa atera zaigu eta prestaturiko ekintzez gozatzeko aukera hobea izan dugu.

Ekain kobazuloaren erreplika bat den Ekainberrira joan garenean, ezin izan ditugu irudirik hartu, baina gure begietan ederki gorde ditugu gure arbasoek egindako marrazkiak eta garai hartako bizimodu gogorra. Horren lekuko, besteak beste, gure ikasleen zailtasunak sua egiteko. Nolanahi ere, hemen bertan egindako tailerrean nahiko ongi moldatu dira eta sua erraztasunez lortzen zutela ikusi ahal izan dugu.

Ibilbideari dagokionez, gaurko eguraldi epelak atzoko lanbroak ezkutatutako paraje zoragarrien edertasuna erakutsi digu. Esaten dugun hori gehiegikeria bat ez dela egiaztatzeko, bideo labur bat grabatu goizean eta beste bat arratsaldean eta zuen esku jartzen dizkizuegu. Zoragarriak!!!

Arratsaldean, berriro ekintza ugari izan ditugu eta gure ikasle “martxoso” hauengan neke arrastorik ez dugu sumatu. Jolasak, kirolak… eta afarian Urkoren 9. urtebetetzea ospatu dugu. Pastelak, globoak, kandelak… eta jarraian, “diskoteka” zaratatsu eta alaia izan dugu. 11:00etan amaitu da gaurko egun luzea eta denak ohera joan dira.

Mezu hau idazten ari garen unean, isiltasun izugarria da nagusi eta denak lo daude lasai-lasai. Azkenean, nekeak bere lana egin du eta Morfeoren altzoan utzi ditu denak.

Bihar goizean, gelditzen zaizkien azken ekintzak burutuko dituzte eta, aurtengo esperientziari amaiera ematen hasiko gara. Datorren ikasturtean, Zarautz izango da ziklo honek egingo duen irteeraren jomuga eta 4. mailakoak ziklotik pasatzen direnez, Zuhatzara joango dira. Baina hori beste baterako utziko dugu.

Jarraian, goizeko, arratsaldeko eta gaueko bideoez gain, egunean zehar ateratako argazki bilduma ere jartzen dizuegu. Ondo pasa gaua eta bihar 16:30ean lehen eskutik jasoko dituzue xehetasun guztiak.

Goizeko bideoa

Arratsaldeko bideoa

Gaueko bideoa

Gaurko argazkiak

Sastarrain, lehen eguneko kronika

jakintza ikastola — Mon, 15 Jun 2009 23:17:14 +0000

Lehen Hezkuntzako 3. eta 4. mailako ia 100 ikasleekin abiatu gara gaur Ordiziatik. Iragarpen guztiek eguraldi kaskarra adierazten zuten eta, zoritxarrez, bete-betean asmatu dute.

Hala ere, aurreikusitako jarduera guztiak arazorik gabe burutu ahal izan ditugu eta oso giro ona bizi izan dugu. Ibilaldia, zumitza tailerra, ukuilua, zalditegia… Jolasak, diskoteka eta bestelako gauza dibertigarriak gaubelan. Tira, euriak ez du itzali gure ikasle hauen gogoa eta, ordu txiki hauetan denak lo dauden arren, oraindik ere zaintzarekin jarraitu beharko dugu, badaezpada ere.

Bihar, Ekain kobazuloaren erreplika bisitatzera joango gara, beste gauza batzuen artean. Ea eguraldiak laguntzen digun eta hemengo paraje zoragarri hauetaz gozatzeko aukera izaten dugun,

Gaur ateratako argazki eta bideo labur batekin uzten zaituztegu.

Bideoa

Argazkiak

The Show

jakintza ikastola — Sat, 13 Jun 2009 08:54:20 +0000

Lehen Hezkuntzako 4. mailako ikasleek Villa Eugeniako jolas eremuan ikuskizun bikaina eskaini ziguten atzo bertan bildutako guztioi. Ingelesako saioetan landutakoa era ikusgarrian taularatu zuten eta, hori gutxi balitz, musikako saioetan ikasitako abesti eta dantza batzuekin ere alaitu ziguten atzoko arrats sargoria.

Zalantzarik gabe, bi ikasgai horien irakasleen lana goraipatu nahi dugu, baina ahaztu gabe gure ikasleek erakutsitako jarrera, jakin-mina eta grina. Bistan da liburuak ez ezik, badirela bestelako baliabide garrantzitsuak ikas prozesuan oso lagungarriak direnak eta ikasleen motibazioa pizteko, eta ikaskuntza esanguratsuagoa lortzeko, balio ikaragarria dutenak.

Jarraian, bertan grabatutako bideoa (50 minutukoa, gutxi gorabehera) eta argazki sorta batekin uzten zaituztegu.

Bideoa

Klik egin ikusteko

Argazkiak

Jakintzazu ale berria

jakintza ikastola — Fri, 12 Jun 2009 11:06:14 +0000

Urtero legez, udako oporren bezperan Jakintzazu ale berri bat kalean dugu. Datorren astean ikasleei banatuko zaien aldizkaria hemen bertan ikus eta jaitsi dezakezue. Era guztietako informazioarekin datorkigu ale honek, baina azpimarragarrienak gure ikastolak jaso dituen sari berriak dela medio eginiko erreportajea eta 2. Batxilergoa amaitu duen promozioari eginiko agurra.

Aldizkaria ikusi nahi baduzue, egin klik azpiko irudian eta jaitsi nahi baduzue, hementxe bertan klikatu beharko duzue.

Como todos los años, poco antes de las vacaciones veraniegas, tenemos un nuevo número de la revista Jakintzazu. La revista que será repartida la próxima semana la podéis ver y descargar aquí mismo. En esta ocasión, destacar el reportaje sobre distintos premios que ha recibido nuestra ikastola así como la despedida de la promoción de segundo de Bachillerato.

Si queréis ver la revista hacer clic sobre la imagen superior. En caso de querer descargarla, hacer clic sobre este enlace.

Udako menuak

jakintza ikastola — Thu, 11 Jun 2009 16:30:11 +0000

Hilero bezala, hemen jartzen dizuegu gure jangelan udan banatuko diren menuak. Menua ikusteko, klikatu azpiko estekan edo jangelako orrialdean bilatu.

Udako menua

Como todos los meses, aquí os ponemos el menú para estas vacaciones de verano. Si queréis ver el menú, haced clic en el enlace inferior o acudid a la página del comedor.

Menú de verano

Hechoko irteera prestatzen

jakintza ikastola — Thu, 11 Jun 2009 07:45:00 +0000

Aurrekoan, ikastolako mendizale taldeak Pirineotara egingo duen irteeraren berri eman genizuen. Garbi dago horrelako irteera bat ezin dela egun batetik bestera prestatu eta gure gurasoek, horrelakoetan, inprobisaziorako tarterik ez dute uzten.

Hori dela eta, duela bi asteburu, guraso talde bat bertara joan zen hango ibilbideak aztertu eta prestatzera. Orduan ateratako argazkiak aurreko mezuan jarri genizkizuen, baina bertan grabatutako bideoa gaur arte ikusi gabe genuen. Bideoa ikusita, hango paisaia zoragarria eta gure gurasoek duten giro bikainak eta “ero” ukituak (Atxerito lakuan grabatutakoa ez galdu) txundituta utzi gaituzte. A ze inbidia!!!

Ikastolaren Eguna arrakastatsua

jakintza ikastola — Sat, 06 Jun 2009 19:27:29 +0000

Eguraldiak euriarekin mehatxatzen zuen arren, bikain portatu da eta giro paregabeaz gozatzeko aukera eman digu. Ez dakigu horregatik izan den, baina antolatutako ekintza guztietan jende andana bildu da eta partaidetza inoiz baino handiagoa izan da. Zorionak guztioi.

Goiztiarrenak LH 3 eta 4. mailakoak izan dira euren joko tradizionalekin. Kromo, ziba, diabolo, txapa, soka, bolo, kurkuluxetan… jolasten harrapatu ditugu. Antzematen da joko modernoagoek horrelakoak baztertu dituztela, baina aukera dutenean, majo disfrutatzen dutela frogatuta gelditu da.

Ia ordu berean, Haur Hezkuntza eta LH 1 eta 2. mailako ikasleak pailazoekin txundituta ikusi ditugu. Ikuskizunean agertu denarekin bat egin dute eta euren aurpegia begiratzea besterik ez zegoen, zenbat disfrutatu duten ikusteko.

Hori plazan gertatzen ari zen bitartean, frontoian guraso eta ikasle helduen arteko futbol partida interesgarri bat ospatzen ari zen. Lehia handia ikusi dugu, baina gazteen indarra eta kalitatea nagusitu egin da. Ez da horrelakorik gertatu, ordea, Herri Kiroletan. Hortxe, guraso, irakasle eta ikasleak epelkerietarako tarte gutxi utziz, oso parekatuta ikusi ditugu. Giro bikaina bizi izan da eta, azkenean, frogak denbora dezente luzatu dira.

Harantz eta honantz genbiltzala, herriko kaleetan, batetik bestera arrapaladan zebiltzan taldeak ikusi ditugu. LHko 5 eta 6. mailako ikasleak ziren. Ordizia hobeto ezagutzeko antolatutako Altxorraren Bila jokoaren frogen erantzunak bilatzen ari ziren. Herriko txoko guztiak arakatu dituzte jokoa amaitu bitartean.

Azkenean, arboledan, guztiok elkarrekin egoteko aukera aprobetxatuz eta prestaturiko pintxo eta edari goxoak dastatuz, amaiera eman zaio aurtengo Jakintza Ikastolaren Egunari. Festaren amaierarekin bat egin nahian edo, euria ere azaldu zaigu une batez, baina ez du zapuztu bertaratutakoen umorea eta eguna giro paregabeaz bukatu ahal izan dugu.

Bideo eta argazki batzuekin uzten zaituztegu.

Bideoa

Argazkiak

Ikastolaren Eguna larunbatean

jakintza ikastola — Thu, 04 Jun 2009 22:15:19 +0000

Aurten, Ikastolaren eguna ekainaren 6ean ospatuko dugunez, ekintza desberdinen programaren berri eman nahi dizuegu eta parte hartzeko gonbidapena luzatu bai guraso, ikasle eta irakasleei.

Haur Hezkuntza eta LHko Lehen Ziklora zuzendutako ekintzak

Goizeko 10:30ean Villa Eugenian ikastolan elkartuko gara guraso,ikasle eta irakasleak.

Plaza nagusian:

10:45 ean Korri Xalto eta Brinko pailazoen emanaldia izango dugu ikusgai.
11:45ean LH2ko Abesbatzaren emanaldia izango dugu.

Bukaeran guraso bakoitzak bere seme-alaba jaso beharko du.

Lehen Hezkuntzako Bigarren eta Hirugarren Ziklora zuzendutako ekintzak

10:30ean Barandiaran plazan elkartuko gara ,3. eta 4.mailakoak . Bertan jokoetan parte hartuko dugu.
10:30ean Barrenako plazan elkartuko gara 5. eta 6. mailakoak. Altxorraren bila ibiliko gara herrian zehar.

DBH eta Batxilergoko Zikloetara zuzendutako ekintzak

Goizeko 10:30ean guraso,ikasle eta irakasleen arteko futbol partidua frontoian.
Goizeko 11:30ean Frontoian, Herri kirolak izango ditugu.

EKITALDI HAUEN GUZTIEN AMAIERAN 12:15EAN HAMAIKETAKO GOXOA IZANGO DUGU GUZTIONTZAT FRONTOIAN.

Oharrak:

Kilometroak 2009ko arropa salgai izango duzue. Aurten Zurriola ikastolak antolatzen du.
Birziklairako jarriko diren zabor poltsak izendatuta egongo dira. Erabil itzazue mesedez