Ordiziako festak ate jokoa ditugu eta, dagoeneko, egitarau ofiziala kalean dugu. Guk, aukera hau aprobetxatuz, ordiziar guztiei jai zoriontsuak opa nahi dizkizuegu eta giroa alaitzen hasteko, egun hauetan gure herrian maiz entzungo den kanta jartzen dizuegu.

Ordiziarrak gara

Festa hauen detaile guztiak eskura izan ditzazuen, egitaraua jaisteko eta ikusteko aukera hortxe daukazue.

Egitaraua jaitsi: Santa Ana Jaiak 2010 (PDF 1,22 M)

Egitaraua ikusi: beheko irudian klik egin

ORDIZIAKO UDALAREN WEB ORRIAN ARGITARATUTAKO ALBISTEA

Festak iristear daude eta ordiziarrak jada giro onean murgiltzeko desiraz daude. Eguraldi onak eta jaien gerturatzeak, ordiziarren arimak alaitzen eta irrika herriko bazterretan nabariarazten ditu. Hala, ostegun honetan hasiko dira Haurren egunekin 2010eko Santanak. Hilaren 24ean botako dute jaiei hasiera ofiziala emango dien suziria Pedro Garcia mendizaleak eta Ainhoa Garmendia sopranoak.

Egun batzuetan zehar herriko kaleak festaz beteko dira. Herritarrek eguneroko bizitza alde batera utzi eta kalera aterako dira, gune ireki eta polibalentera, guztiak elkar bizi diren kalera.

Bi asteburu mugitu espero dira Ordiziako kaleetan. Ekintzak herritar guztiak kontuan izanda antolatu dira baina urtero bezala egitaraua herritarren sektore ezberdinetara zuzendua dago. Hainbat berrikuntza ere izango dira. Esate baterako, ostegun honetan musika jaialdia izango da. Gazteek euren trebezi artistikoa erakutsi ahal izango dute, adibidez gitarra joz, abestuz, play back eginez, etab.

Beraz, lehenengo asteburua haur eta gaztetxoenentzat zuzendua dago, larunbatean “txikien koadrila eguna” da. Igandean, haurren alkate jaun-andreei harrera egingo zaie, arratsaldeko 8etako danborradan protagonistak izango baitira.

Boxeoa, pilotalekuan
Bigarren asteburuan era guztietako ekintzak egongo dira. Hasteko, uztailak 23an, ostiralean, hainbeste gustatzen den Boxeo Jaialdi Handia izango da. Aurten Majori utzi eta berriro Beti Alai pilotalekura itzuliko dira borrokalariak Boxing jaialdia ospatzera.

Ofizialki jaiak 24ean hasiko dira, eguerdiko 12.00etan Garmendiak eta Garciak botako duten txupinazoarekin. Arratsaldeko 6.00etan V. Koadrilen arteko bigantxa futbol txapelketa – Johan Usabiaga II. Memoriala jokatuko da. Eta egun borobilari amaiera emateko helduen danborradak soinu eta hotsez beteko ditu herriko kale eta bazter guztiak gaueko 9.30etatik aurrera.

Santa Ana bezpera kirol ekintzez beterik egongo da. Garrantzitsuena edo esperoena, profesionalentzako LXXXVII. Villafranca txirrindulari proba izango da, goizeko 10.00tan hasita. Haurrentzat arratsaldeko 5etan Argote pailazoen emanaldia da nobedade. 5.30etan larruzko paletaz finala jokatuko da Beti Alai pilotalekuan eta ondoren, Idoiaga plazan Zaldi ikuskizuna izango da “El Albero” zezenzaleen peñak antolaturik. Eguna bukatzeko, herriko gazteek euren mozorro originalenak aterako dituzte armairutik gaua festan igarotzeko.

Puntako pilotariak
Santa Ana eguna jai-egun handia da ordiziarrentzat, izan ere herriko zaindaria da. Eguna goizeko ohiko mozorrotuen danborradarekin hasten da. Goizeko 11.00etan parrokian meza nagusia ospatuko da, jarraian Irungo bandak plazan emanaldia 13.00etan eskainiko duelarik.

Arratsaldeko 6etan eskuzko pilota partidak egongo dira. Berasaluze IX eta Merino II, Idoate eta Galarza VI-ren kontra neurtuko dira eta segidan Martinez de Irujo eta Merino I, Titin III eta Eulateren aurka ariko dira.

17.00etatik 21.00etara, lehenengoz, haur dantzaldia izango da Egan taldearekin. Eguna bukatzeko “Azabache” Mariachien emanaldia izango da gaueko 11.00tan. Biak Plaza Nagusian izango dira.

Uzatailak 27, festen azken eguna da. Egun handia hau ere, Sanataneroen eta kuadrilena. Goizeko 11.00etan Santanazaleen meza ospatuko da parrokian; jarrian ohiko esku-dantza herriko plazan dantzatuko dute azken urtebetean ezkondutako bikoteek.

Eguerdiko 13.00etan elkartuko dira herriko gazte eta heldu guztien koadrilak festen azken egunaz gozatzeko. Txarangen soinu eta giro apartaz lagunduta kalejira ezin hobeak paseatuko dituzte herriko bazterrak.

Gauerako aukera ezberdinak ditugu festak ondo bukatzeko. Herriko plazan, “La Dama Show” orkestrarekin dantzaldia izango dugu alde batetik. Bestetik, “Disko Jaia” Beti Alai pilotalekuan eta bukatzeko, camp-dantzaldia Garagartza plazan “Azabache” taldearekin.

Egungo egoera kontuan izanda, festen aurrekontua murriztu beharrean aurkitu da Udala baina hala ere programazioan aldaketa handirik ez da eman. Denbora pasatzeko eta gozatzeko ikuskizun, musika, kirol, hau da, ekintza ugari egingo dira denentzat.

Iturria: Ordiziako Udala

Kalean da ‘Seme alabak’ aldizkariaren 10. alea.

Altzaga, Arama, Beasain, Itsasondo eta Ordiziako udalek finantzatzen duten drogamenpekotasunen zerbitzuak argitaratzen du eta honako gaiak lantzen ditu:

• Erlazio psikomotrizista eta atentzio goiztiarra (0-5 urte)
• lagunarteko hizkuntza (6-11 urte)
• kontsumo arduratsua (12-18 urte)
• eta familiek luzatutako zalantzei ere erantzuten zaie

Aldizkaria jaisteko klikatu ondorengo estekan: Seme-Alabak 10. alea (PDF 2,1 MB)

Eta aldizkaria ikusteko klikatu azpiko irudian:

Gaur goizean, Ordiziako Jakintza eta Urdanetako Lehen Hezkuntzako bigarren zikloko ikasleek egun zoragarria igaro dute Xibak antolaturiko ekitaldian.

Xiba egitasmoaren izaera hobeto ulertzeko, hobe izango da euren adierazpena irakurtzea:

XIBA, Euskal Herriko Ikastolen Konfederazioko proiektua da, Euskal Herri osoko partaidez osatua; Euskal herri guztirako eta guztientzat zabaldua. Gure egitasmoa EHIKtik jendarterako egiten dugun proposamena da, norberak bere bizia gozatuz, orekaz eta osasuntsu bizitzeko. Pertsonen garapenean ludikotasuna ezinbestekotzat daukagu eta elkarren arteko komunikazioan zutabe, bestela harreman hori hiltzen baita. Jolas eta jokoak tresna paregabea dira bizitzan gozatzeko eta horren bila joan nahi dugu.

«Kulturik gabe ez dago herririk eta jolas jokorik gabe ez dago kulturarik » zioen norbaitek. Gure arloaren bitartez, hau da euskal kulturarekin bat egiten duen euskal ludikotasunaren bitartez, euskal kultura eta euskara indartu nahi ditugu. Hara laburki azaldurik gure helburua zein den ; horretara heltzeko zer proposatzen dugu ?

Bada, hanka sartzeko beldurrik gabe, gaur Ordizian bizi izan dugunarekin, esan dezakegu euren helburuetako asko bete-betean lortu dituztela. Izan ere, goiza ezin hobea bizi izan dugu eta bi ikastetxeetako ikasleen artean oso giro polita sortu da.

Eta esaten dugunaren lekukoak, jarraian jarri dizkizuegun bideo eta argazki bilduma.

BIDEOA

ARGAZKIAK

Hiri Hezitzailea proiektuaren barnean, hirugarren ekitaldia burutu dugu gaur, maiatzaren 31an, Jakintza ikastolako DBH 2ko komunikazio taldeak.

Hasi aurreko urduritasunak soinetik kenduta, arratsaldeko 15:30ean, dotore dotore jantzita, agertu dira gure artistak Jubilatuen Batzar Aretora. Gaur egun arrotza egiten zaigun eskola zaharra, une batez, begien bistan izan genuen, bere janzkera, ohitura eta erritoekin. Entzuleen artean zegoen jendeari barre algara bat baino gehiago eragin dio antzezpenak.

Gertuagoko bizipenak izan dira, gaur egungo eta etorkizuneko eskola azaldu dutenekoak. Dena den publiko artean zegoen bakarren batek komentatu du antzerki honetan gertatutako aldaketak baino handiagoak gertatuko direla etorkizuneko eskolan.

Beti bezala, denbora izango da horren lekuko eta egindako aipamenari arrazoia eman edo kenduko diona.

Ordizia Hiri Hezitzailea proiektuaren barnean “Belaunaldien arteko bizipenak konpartituz” gaiaren inguruan, ekimen polita eta guztiz aberasgarria gauzatu dugu ikastolan.

DBH4ko ikasleek “El florido pensil” pelikula ikusi eta landu ondoren, jubilatuekin egiteko solasaldiaren zain geratu ginen, horrela, asteartean, bertan izan genituen Belen Maiza Udaleko Kultura zinegotzia eta egitasmoaren bultzatzailea, Joxe Garmendia EHUko irakaslea eta Jubilatu Elkarteko bost kide.

Helduek beraien gaztaroan izandako bizipenak gurekin konpartitu nahi izan zituzten, horretarako; garaiko eskola, sinesmenak, lan munduaren gorabehera edota aisiarako aukerak eta moduak azaldu zizkiguten.

Ikasleek adi-adi entzun zituzten haien gazte garaiko kontuak eta benetako ikasgai bat landu zuteneko inpresioarekin geratu ziren. Ekimen polita eta aberasgarria benetan.

Horra hor, ateratako argazkien bilduma:

HIZKUNTZA ETA MAILA ESKAINTZA:

Frantsesa eta Ingelesa: Oinarrizko Maila (A1 – A2 )
Tarteko Maila (B1.1)

MATRIKULA EPEA: Uztailan (1etik 20ra).

GUTXIENEKO ADINA

16 urte beteta edukitzea ikasten hasteko urtean.
Ikasten hasitako urtean 14 edo 15 urte dituztenek ere ikas dezakete, DBHn lehen hizkuntza gisa ikasitakoa ez den beste hizkuntza bat ikasi nahi badute.

INFORMAZIOA:

943 88 86 75
www.eoieuskadi.net
www.eoi-ordizia-heo.net

Asteazkenean, hilaren 19an, Ordiziako Jakintzako 5. eta 6. mailako ikasleek Urdanetakoekin batera “Herri Antzokian” bertso jaialdi bikaina eskaini ziguten.

Emanaldi hau, ikasturte osoan zehar bertsolaritzaren inguruan egindako lanketaren amaiera izan da. Izan ere, Bertsozale Elkarteko kide eta bertsolaria den Amaia Agirre, astero ikastolako Lehen Hezkuntzako 3. ziklora dator gure ikasleak hitz, doinu eta errimekin jolas daitezen. Gela bakoitzak bi astez behin parte hartzen du proiektu honetan eta, nola ez, ikasleek ikasturte osoan zehar ikasitakoa eta ekoiztutakoa senide eta lagunen aurrean agertu nahi izaten dute.

Aurten guztiak batera kabitzen ez zirenez, bi emanaldi eskaini beharrean aurkitu ziren, 5. mailakoak alde batetik eta 6. mailakoak bestetik.

5. mailakoek oso gai ezberdinak jorratu zituzten; Zuberoako makil dantza, ikasturte amaierako bidaian gertatutako pasadizoa, urtebetetzeetako meriendak, alfabetoa, “Ordiziako Peria”… eta urduritasunak sortutako zirrarari kemenez eta ilusioz aurre egin zioten, emaitza oso polita lortuz. 6.mailakoak, berriz, mendizaleak bilakatu eta Txindokira bidean ikasleek izandako gorabeherak, bertsoz abestu zituzten, emanaldi atsegina eskainiaz. ZORIONAK guztiei!!!

Jarraian, emanaldian botatako ale bat eta bertan ateratako argazki bildumarekin uzten zaituztegu.

TXINDOKI, TXINDOKI
igoko deu aurki
TXINDOKI, TXINDOKI
pasako deu ederki.

Antzerkian irakasleak zirenak ere, beraien ezinegonak agertu zituzten:

Arrazoi dezu, ibilaldia
gehiegizkoa izan da.
Alde ederren egongo ginen
“tunbona” baten etzanda.

Izerdietan itto ditzagun
gure kexa eta penak
Umeak bueno, baino askotan
gurasoak dira okerrenak…..

ARGAZKIAK

Oianguren institutua, Urdaneta ikastetxea eta Jakintza ikastolako ikasleak Jose Miguel Santamaria alkatearekin bildu dira Eskola Agenda 21eko entzunaldian. Ikasleek urtean zehar Agenda 21aren inguruan egindako lana eta hartutako konpromisoak azaltzeaz gain, hainbat galdera eta eskaera egin dizkiote alkateari.

Hala, besteak beste, gazteek trafiko arauak errespetatu eta herrian oinez ibili edo garraio publikoa erabiltzeko konpromisoak hartu dituzte.

Gainean klikatu handiagoa ikusteko

Udalari luzatutako proposamenen artean, honakoak: herritarrak kontzientziatu autoa gutxiago erabil dezaten, bidegorria bukatu, autoen zarata arazoak saihestu, zabor organikoa biltzeko edukiontzi bereziak ipini, zona berde eta lorategi gehiago ireki eta taxi, autobus eta zabor-kamioi elektrikoak sustatu. Iaz aipatutako gaien artean erantzunik izan ez dutenak ere gogoratu dituzte: garraio publikoaren prezioak jaitsi eta ordutegia zabaldu, N-1 errepidean panel-isolagailuak jarri, skate parkearen berri izan eta bidegorria eskolaraino ezarri.

Edukiontziak, bidegorria eta skate parkea

Goierrin zabor organikoa biltzeko edukiontzi berriak jartzen hastear daudela erantzun du alkateak. Ordizian urtarriletik aurrera izatea espero da. Bidegorri sarea ere ia definituta dagoela esan du. Herriko hainbat gune lotzeaz gain, inguruko herriak ere batuko ditu. Herrian lehentasuna izango dute kiroldegia eta ikastetxeen arteko zatiek, Tximista eta geltokiaren artekoak eta skate parkera eramango duenak. Dena dela, epe luzera osatzen joango den proiektua dela azpimarratu du Santamariak.

Gainean klikatu handiagoa ikusteko

Skate parkeari buruz jakin-mina azaldu dute ikasleek. Obra aste honetan esleitu eta aurten bukatuko dela jakin dute. Parkeak 800 metro koadro izango du eta 3.000 metro koadroko udal eremu berrian egingo da, ‘bonberiaren’ parean, ibiaren beste aldean. Proiektua herriko gazte batzuen laguntzaz diseinatu da eta laster emango da ezagutzera. Dena dela, ikasleek alkatearen ordenagailuan ikusteko aukera izan dute.

Parke hau herrian dauden besteei gehituko zaie. Alde horretatik, Ordizia ‘eredugarria’ dela argitu du alkateak, udalerrian parke eta gune berde asko dagoelako. Udaltzaingoak auto elektrikoa baduela eta garraio publikoaren ordutegia zabaltzeko eta bailara mailakoak diren gaiak lantzen ari direla esan du, ahal den neurrian erantzuna emateko.

Gainean klikatu handiagoa ikusteko

N-1eko zarata gutxitzeko panelak Foru Aldundiak jartzen ditu. Lasarten eta Billabonan ari dira jartzen une honetan eta segidan Ordizian, Euskal Pilotan hasita, ezarriko dira.

Azkenik, gazteen laguntza eskatu du alkateak Udalaren izenean, euren familia eta ingurukoen artean kontzientziatze lana egin eta mugikortasun arazoak denen artean gainditu ahal izateko.

Iturria: Ordiziako Udala

Informazio gehiago: Goierriko Hitza

Euskal jolasak ikastaroa izango da Ordizian maiatzaren 17an hasita Udaleko Euskara Zerbitzuak Euskara Biziberritzeko Planaren (EBPN) barruan antolatuta. Lehen Hezkuntzan seme-alabak dituzten gurasoei begira, eta haurrekin eta gazteekin aisialdian ibiltzen diren hezitzaile nahiz lehen hezkuntzako irakasleei begira antolatu dugu ikastaroa.

Taldea osatzeko gutxienez zortzi lagun beharko dira; eta gehienez ere, 20 ikasle onartuko dira. Hamar euroko prezioa du ikastaroak, baina ikasle eta langabetuek bost euro ordainduko dituzte. Izen-emate orduan ordiziarrek lehentasuna izango dute.

Maiatzaren 10ean amaituko da ikastaroan izena emateko epea. Udaleko Euskara Zerbitzuan egin behar da izen-ematea.

Jarraian duzue ikastaroaren gaineko informazio zehatzagoa:

HARTZAILEAK

• Lehen hezkuntzako irakasleak
• Hezitzaileak
• Gurasoak

HELBURUAK

• Jolasaren garrantziaz hausnartzea eta jabetzea
• Jolasek euskara sustatzeko duten garrantziaz jabetzea
• Jolasen bidez transmititzen den haur hizkera ez formalean trebatzea
• Euskararen normalizaziorako tresnak ikastea

EDUKIAK

• Jolasaren garrantzia
• Jolasaren elementuak
• Euskara sustatzeko jolasen programazioa
• Jolasaren hizkuntza eta hizkuntzaren jolasa

IRAUPENA

• 9 ordu

DATAK eta ORDUTEGIA

• Maiatzak 17-18: gurasoak bakarrik (17:00-18:30)
• Maiatzak 19: Gurasoak eta haurrak (17:00-18:30)
• Maiatzak 24-25: Gurasoak bakarrik (17:00-18:30)
• Maiatzak 26: Guraso eta haurrak (17:00-18:30)

MATRIKULA EPEA ETA PREZIOA

• Maiatzak 10 10€ (5€ ikasle eta langabetuak)

Apirilaren 26an iragarrita bezala, Jakintza ikastolako DBH 1eko komunikazio taldea, Maider Bartolomeren gidaritzapean Ordiziako jubilatuen etxera hurbildu zen.

Gure ikasle taldeak bazuen bete beharreko eginkizun garrantzitsu bat arratsalde horretan. Azken bi urte hauetan lantzen joan da Ordizian Hiri Hezitzailearen proiektua. Ordiziako Udala eta Euskal Herriko Unibertsitatearen gidaritzapean partaide izan gara Ordiziako eskola, elkarte edo eragile ezberdinak. Proiektuaren lehen fasea egin den honetan, iritsi da ekintza ezberdinak garatzeko unea.

Arratsaldeko 15:30etarako, jubilatuen etxeko Batzar Aretoa leporaino beteta zegoen eta gure ikasleen zain zeuden bertara hurbildutako aiton amona eta/edo gurasoak.

Oholtza gainean, antzerki mutuak eskaini ziren eta gorputz espresioaren bidez, bertara hurbildutakoen arreta lortu zuten gure antzezleak.

Esango genuke gustura irten zirela aiton amonak eta baita gure ikasleak ere. Zalantzarik ez dago belaunaldi ezberdinen arteko proiektuak, harremanak edo transmisioak oso interesgarriak direla. Denok ikasten baitugu besteengandik, kasu honetan gure ikasleak hurbildu dira jubilatuen etxera eta hurrengoan jubilatuak etorriko dira gure ikastolara, izan ere, sekulako altxorra eta jakinduria baitute beraiekin. Esan dugunaz gain, garrantzitsuak diren beste balore batzuk lantzeko oso baliagarriak dira lanketa hauek. Saioaren amaieran horixe izan zen azpimarratu genuena, batez ere ikasleek jarri zuten gogoa, arreta eta interesa aiton amonak gustura uzteko.

Amaitzeko, ekitaldian ateratako argazki sortarekin uzten zaituztegu.