Urtero legez, udazkenaren hasieran, Gipuzkoako Ikastolon jaia ate joka dator eta guk ahalegin berezi bat egingo dugu jai erraldoi honen inguruko xehetasun guztiak zuenganatzen.

Maiatzean, kantaren berri eman genizuen, bada, orain, bideoklipa aurkeztu nahi dizuegu. Kilometroak 2010eko bideo gehiago ikusi nahi izanez gero, joan zaitez Youtuben ireki duten kanalera.

KLIPA

IBILBIDEA

Jarraian datorren ibilbidearen inguruko informazio hau, Kilometroak 2010 aldizkaritik atera dugu.

Ibilbidearen irudia jatorrizko neurrian ikusteko, klikatu gainean.

2010eko Kilometroak jaialdiko ibilbidea Lezon izango da. Aurtengo leloarekin bat eginez, ibilbideak bost gune izango ditu.

Lehena, beraz, Arraintoki izango da. Bekoerrota kiroldegi parean dagoen orubean ibilbideko lehen geldialdia topatuko dugu. Autoak edo autobusak Portuan aparkatu ondoren, trenbideak egiten duen bideari jarraituz gunera sartu ahalko dugu kilometrozaleek. Gunearen izenak dion bezala, garai batean itsasoarekin lotura zuen orubeak. Giza ekintzek, ordez, aurretik padura zena, egungo Pasaiako Portua bilakatu dute.

Handik atera eta Altzateko biribilgunetik gora, Altamira auzoan barrena sartuko gara. Bideak gora egin ahala, Pasaiako badia, baita Errenteria-Orereta ere gainetik ikusteko leku ezin hobea da Altamira. Inguru hiritarretik Herriondo bailarara, baserri auzora, garamatza ibilbideak. Bidean Darieta ur-biltegia topatuko dugu. Egun Lezon dagoen handiena. Ur-biltegiaren beste aldean, aldiz, Darietazarra baserria dago.

Gure herriak mendeetan jasandako gerratan Lezoko hainbat eraikin gotortu zituzten soldaduek. Darietazarra baserria Bigarren Karlistadetan gotortu zuten baserrietako bat da. Darietazarreko kaskoa leku estrategikoa da, izan ere, bertatik Lezoko kaskoa eta Donostia, Pasaiako Portua, Errenteria eta Aiako Harria ere ikusten baita. Pixkanaka-pixkanaka zelai eta baserri artean, Lezoko futbol zelai zaharrera iritsiko gara, Darietagunera, alegia.

Herriondo bailaran aurrera eginez, Amunttene gunera iritsiko gara, Miura baserriaren ondotik igaroz. Miura baserriaren eskubiko zelaian mugarri bat dago. Zedarri horrek Oiartzun eta Lezoren arteko muga markatzen zuen 1320 baino lehen. Egun, ordea, Lezo eta Errenteriaren arteko muga erakusten du. Izan ere, 1320. urtean Gaztelako erregeak Villa Nueva de Oiarso sortu zuen Oiartzungo lurrak murriztuz, eta Errenteriari Pasaiako Portura zihoazen produktuen zergak biltzeko eskubidea eman zion. Hortik herriaren izena.

Amunttenen, Darietazarreko gainean bezala, Pasaiako badiako sarrera ikus daiteke. Itsasoak eta mendiak osatutako bokaleaz goza daiteke Amunttenetik, eta Oiartzun ibaiaren itsasoratzearen ikuspegi aparta eskaintzen digu. Naturak ez digu sorpresa hori bakarrik ezkutatzen Amunttenen. Izan ere, beste aldera begiratuz gero, Aiako Harria mendiaren silueta dotoreak egiten digu harrera.

Laugarren gunera abiatzen bagara, Gaintxurizketako bide zaharrari helduko diogu. Urrullo baserri ondoko zelaiek, lasaitasuna eskaintzen dute. Errepidea bertatik bertara izan arren, zelaian gora eginez gero, hiriko zaratak alde batera utzi, eta Jaizkibel mendiaren magiak inguratzen gaitu.

Oarsoaldean, ordea, industriaren presentzia ezinbestekoa izan da azken mendean. Horren lekuko dira eskualdea inguratzen duten industriaguneak. Aipatutako gune horietako bat osatzen du Algeposak. Naturaren eta industriaren arteko kontrastearen erakusle paregabea da Algeposako gunea. Kamioiak, haiek gora eta behera darabiltzaten materialak, biltegiak… denetik dago Algeposan, baina, bidean aurrera jarraituz gero, berriro ikusmira ederrarekin egingo dugu topo. Urdalamarta eta Borda baserrien aurretik pasatzean, Lezoko herriak Pasaiako badiari nola begiratzen dion sumatu daiteke.

Bost guneak igaro ondoren, berriz ere, Lezora jaitsiko gara eta Karlos Saldise plazatik hasi, Euskal Herria plazatik pasatu eta Bekoerrota kiroldegi ondoraino jarraituko du ibilbideak.

2010eko urriaren 17an Atarrabian, euskaltzaleok Nafarroako ikastolen eta euskararen aldeko jaialdi handia ospatuko dugu: NAFARROA OINEZ

Oraindik oso goiz da Paz De Ziganda Ikastola antolatzen ari den jai erraldoi honen inguruko xehetasunak ematen hasteko, baina motorrak berotzen hasteko, argitaratu dituzten kan eta bideoa ezagutzera eman nahi dugu.

Jose Angel Irigarai poetak idatzi ditu abesti horretako hitzak, eta Miel Otxin musika taldeak egin du doinua. Balkanetako ijitoen musikari keinu eginez, aurtengo Nafarroa Oinez-en leloan dago oinarritua abestia: Munduz mundu.

Abestia entzun edota jaitsi nahi baduzue, klikatu azpiko estekan:

2010eko Nafarroa Oinez kanta – Munduz mundu

BIDEOA

Gure ikastolako mendizale taldeak mendi irteerak antolatzearekin nahikoa ez eta beste ekimen interesgarri bat abian jarri du: iparraldeko ikastolen alde urdaiazpiko eder baten zozketa.

Euren blogean ekimen honen berri argitaratu dute eta guk oso-osorik hona ekartzea erabaki dugu. Horra hor:

Euskal Herriko Ikastolak, erakunde berriak, ikastola guztiak erakunde nazional bakar batean batzen dituenak, lehenengo urratsak ematen hasia da.

Kate baten indarra maila ahulenean neurtzen denez, kaskarrenak zainduz eta sendotuz ekin beharrean gaude bide berri hau.

Ikastolak sortu zirenetik badugu horretan esperientzia, guraso eta irakasle euskaltzaleen lanari esker, hasieratik elkartasunaz ongarritua izan den baratzak fruituak bikainak eman dizkigu.

Ibilaldia , Araba Euskaraz, Nafarroa Oinez, Kilometroak eta Herri Urrats urtero ospatzen diren festak ezinbestekoak dira ikastolen finantziaziorako.

Festa hauen arrakasta hein handi batean eguraldiaren menpe dago, eta aurten, maiatzaren 9an, Senperen ospatu zen Herri Urratsean ez genuen aldekoa izan. Eguna amaitu aurretik antolatzaileen ahotan entzun genuen eguraldi txarrak ez zituela geldiaraziko Iparraldeko ikastolen proiektuak, eta dituzten erronkekin aurrera segitzeko asmoa zutela.

Egoera sozio-politiko honetan lan egiten dute iparraldeko ikastolek:

• Ipar Euskal Herriak ez du ezagupenik
• Ipar Euskal Herriak ez du instituziorik
• Euskara ez da ofiziala
• Ikastolen eraikuntza laguntzea legez debekatua dago (Falloux legea 1848)
• Ikastolen funtzionamendurako laguntzak ez daude arautuak.

Gaur egun, egoera honetan, hizkuntza politika eraginkorrik gabe, ikastolak dira euskararen transmisioa segurtatzen duten eragile nagusiak iparraldean.

Biharko ingienari, mediku, laborari, autobus gidari baita irakasle euskaldunak, ikastoletako haurrak izango dira. Gaur egun iparraldean ikastola gehienak ikasleez gainezka dituzte eta ikasturte honetan bi ikastola gehiago irekiko dituzte: Lekornen eta Itsasun.

Falloux legepean, laguntzak arautu gabe, Hegoaldeko diru laguntzak murriztuz, ikastolen eta euskararen geroa guraso eta euskaltzaleen gain dago. Egoera honi aurre egiteko Euskal Herri osoko elkartasuna berraktibatzea beharrezkoa ikusten da eta bide hori jorratzeko eskaera luzatu digute euskaltzale guztioi.

Laster, gure ikastolaren eguna ospatuko dugu eta mendiz mendi gabiltzan guraso taldeari festa ingurua egokia iruditu zaigu eskariari erantzunez diru bilketa bat egiteko, eta bidez batez, gaiari buruzko kontzientziazioa bultzatzeko.

Diru bilketa gauzatzeko, txartelak salgai jarriko ditugu eta euro baten truke erosleek urdaiazpiko eder bat etxera eramateko aukera izango duzue. Horretarako, txartela erostean, urdaiazpikoaren pisua asmatu edo gehien inguratu beharko zarete gramo bakar batean ere pasatu gabe.

Hilaren 18an Ordiziako Plaza Nagusian, arratsaldeko zazpietatik aurrera eta 19an ikastolaren festa gunean jarriko gara txartelak saltzen. Irabazlea egun berean, eguerdiko 13:00etan jakingo da eta zuzenean adieraziko zaio berri ona.

Eskertuko dizuegu honen berri zuen inguruan zabaltzea.

Atzo, ospatutako IBILALDIko zozketetan saritutako zenbakiak ondorengoak dira:

KOTXEko zozketa

27352

ordezkoa (1): 22359 *
ordezkoa (2): 50059 *

Asturiasera bidaia:

10108

ordezkoa: 6567 *

Kanariar irletara bidaia:

357

ordezkoa: 5718 *

* Zozketa egunetik hilabete igaro eta saridunik agertuko ez balitz, ordezko zenbakiak hartuko dira saridun gisa.

Informazio gehiago: Ibilaldia

Iparraldeko ikastolei laguntzeko helburuarekin, Maiatzaren 9an ospatu zen aurtengo Herri Urrats. Euskal Herrian sarritan gertatzen den moduan, eguraldiak ez zuen asko lagundu eta nahiz eta milaka euskaltzale inguratu Senpereko aintzira, garbi dago aurre ikusi baino jende gutxiago eta noski baita ere diru gutxiago bildu zela.

Eguna amaitu aurretik entzun genuen antolatzaileen ahotan eguraldi txarrak ez zituela geldiaraziko Iparraldeko ikastolen proiektuak eta dituzten erronkekin aurrera segitzeko asmoa zutela.

Herri Urratseko antolatzaileek esaten zuten aurtengoa ez zela maiatzaren 9an amaituko, baizik eta urratsez urrats, urte osoan iraungo duela ekimenak.

Zentzu horretan eta bertara hurbiltzerik izan ez, eta diruz lagundu nahi baditugu Iparraldeko ikastolak oraintxe dugu aukera. Ondoren aipatzen dira kontu korronteko zenbakiak.

Kutxa : 2101004597 0003310786
Euskadiko Kutxa : 3035 0059 82 0590731197

Amaitzeko, egunean zehar saldutako errifen zozketaren berri ematen dizuegu. Eroski Bidaiak eskainitako saria, Asturiasen egonaldiaren irabazlea

2652

zenbakia izan da.

Kalean da Ikastola aldizkariaren azken alea. Zenbaki honetan, azpimarragarriak dira Ibilaldia eta Araba Euskarazen inguruko erreportajeak, Balmasedako ikastolako lehendakaria den Jose Mari Agirreri eginiko elkarrizketa, Seaskako ikasle ohien inguruko erreportajea, Nafarroako ikastolen urteurrenak…

Aldizkaria jaitsi nahi izanez gero, klik egin azpiko estekan. Ikusi nahi baduzue, beheko irudian klik egin.

Ikastola aldizkaria 182. alea (PDF 3 MB)

Aldizkaria ikusi:

2010-2011 ikasturterako Ikastolen Elkarteak argitaratutako ikasmaterialen katalogoa jada kalean da eta hemen jartzen dizuegu ikusteko edo jaisteko aukera izan dezazuen.

2010-2011 ikasturteko ikastolen Ikasmaterialen katalogoa jaitsi (PDF 3Mb)

Katalogoa ikusteko, klikatu irudian

Dantzagarria eta freskoa eta ibiltzeko gonbitea egin asmo du. Hala defenitu du gaur Esne Beltzako abeslari Xabi Solanok Kilometroetarako landu duten abestia. Pasaia-Lezo Lizeoak Antxon duen ikastolan aurkeztu dute, Xabi Solano bertan zela. Ikasleek lagunduta kantaren leloa abestu du prentsa aurrean. Aurkezpenaren amaieran ikasleek abestiarekin landu duten koreografia dantzatu dute. gaur esan dutenez, Esne Beltzak ekainaren 2an kaleratuko du bere azken diskoa, eta disko horretan Kilometroetako abestia sartuko dutela esan dute.

Abestia entzuteko edo jaisteko, klikatu azpiko estekan.

KMK10 kanta – hONA BOSTEKOA

hONA BOSTEKOA

Hatz potoloa
saltoka doa
Pasaia-Lezon baitu egun pasa oparoa

eskura du euskara.
Hatz erakusle
milaka puzzle
badiaren bost puntak non batzen diren ikusle
eta eskura du euskara.

Hatz bihotza da
denen taupada
kresalarekin haizean hedatzen den algara

eskura du euskara.
Hatz alferrena
lotan zaudena
zoaz anai-arrebekin bidean barrena
eta eskura du euskara.

HONA BOSTEKOA, ONA!
EUSKARA BABESTEKO
ETA EUSKARAZ JOLASTEKO
HONA BOSTEKOA, ONA!
EUSKARA BABESTEKO
ETA EUSKARAZ SOLASTEKO

Hatz ttipiari
begira adi
ikastolarekin batera egingo da handi!
eta eskura du euskara.

HONA BOSTEKOA, ONA!
EUSKARA BABESTEKO
ETA EUSKARAZ JOLASTEKO
HONA BOSTEKOA, ONA!
EUSKARA BABESTEKO
ETA EUSKARAZ SOLASTEKO

IKASLEEN KOREOGRAFIA

Iturria: Oarsoaldeko Hitza

Haur eta gazteen aisialdirako begirale izateko beharrezkoa den agiria eskuratzeko ikastaroaren matrikula epea zabalik dago. Ikastolatik kanpo geratzen den hezkuntzari hezkuntza ez-formala esaten zaio. Balio-heziketan oinarritutako hezkuntza honen bitartez, klaseetatik kanpo, astialdian ume, nerabe eta gazteei hainbat balio hedatzen zaizkie:

- partaidetza
- konpromisoa
- lagunkidetasuna
- ingurumenerako errespetua
- euskararekiko motibazioa
- genero berdintasuna

Kartela handiagoa ikusteko, klikatu gainean

Ikastaroak 200 ordu teorikoez gain, 120 orduko praktikak ere izango ditu eta ikastaroa bukatzean Eusko Jaurlaritzako Kultura Sailak emandako “Haur eta gazteen aisialdirako begirale titulu” ofiziala eskuratzen da. Ikastaroan, besteak beste, lantzen diren gaiak hauek dira:
- adierazpena
- suspertzea
- talde-dinamika
- aisialdiari buruzko soziologia
- pedagogia
- psikologia
- parte hartzea
- heziketa aisialdian

Ikastaroa urrian hasten da eta 16 asteburu ondoren bukatzen da hurrengo urteko abenduan. Matrikulazioa egiteko epea dagoeneko zabalik dago eta irailaren 21ean amaituko da. Informazioa gehiago nahi izanez gero sartu www.ikastola.net web orrialdean.

Igande honetan, maiatzaren 9an, Senpereko aintziran iparraldeko ikastolen aldeko jaia ospatuko da. Eguraldia kaskarra badugu ere, ziur iganderako atertu eta berotuko duela. Gutxienez, horixe da gure desioa. Izan ere, denok dakigun bezala, iparraldeko ikastolen egoera ez da nahiko genukeen bezain ona eta guztion laguntza ezinbestekoa dute aurrera egiten jarraitu ahal izateko.

Bertara joateko asmoa duenak, mezu honetan esan genizuen bezala, autobusa antolatuta dago. Momentuz, bertara joateko behar duzuen informazio guztia jartzen dizuegu:

ABESTIA

Abestia entzun edo jaitsi beheko estekan klik eginez.

Herri Urrats 2010 – Kanta

Euskara mihian, irria begian !

(Hitzak : Eztitxu Oillarburu / Bost gehio eta Mikel Hats )
Bost gehio eta Mikel hats

KANTAREN LETRA

Hemen ahotsek kantu han zangoek fandango,
Jendeak solasean euskaraz nahiago,
Ikurriñak airean,
Aintzirako aldean,
Aurten ere bagira Herri Urratsen frango,
Senpere airos dugu nehoiz baino gehiago.

Atzo ikastola zen gurasoen ametsa,
Hainbat urtez eraman zuten proiektu gaitza,
Baina elkartasunez,
Esperantza ukanez,
Gauzatzen lortu zuten miresten zen emaitza,
Hauei esker euskaraz gaur ikasten gabiltza.

Gazte xuti, bada lan, oraindik elgarrekin,
Etengabe gainditzen diren oztopoekin,
Gure eskutan doa
Euskaldunon geroa
Hizkuntza erabiliz adin guziek berdin
Belaunaldiz jauzika euskara bizi dadin !

Errepika:
Herria bihotzan atxiki nahian
Bizi, hazi, euskara mihian ta irria begian

BIDEOA

EGITARAUA

ARABA

• 10H Katalanak
• 11H Herri Kirolak
• 12H30 Mutxikoak
• 13H30 Herri Urrats kantuz
• 15H La mal coiffée
• 16H30 Bizardunak
• 18H Xutik

GIPUZKOA

• 10H Poliki
• 10H30 ASCA
• 11H30 Poliki
• 12H KSI
• 13H Dantzaz
• 14H30 Ander Lipus
• 15H Capoeira liberdade
• 16H30 Tipul eta putil

LAPURDI

• 10H Bertsolariak
• 11H Pil Pil
• 12H Mikel hats
• 13H30 Xabier San Sebastian
• 15H Garen
• 16H Jean Mixel Bedaxagar – Mixel Aroce
• 16H30 Abolicao Capoeira
• 17H Salsa berde

NAFARROA

• 10H Bostgehio
• 11H Bertsolariak
• 11H30 Sorotan Babies
• 13H Anari
• 14H30 Mutxikoak
• 15H30 Zea Mays
• 16H30 Abolicao Capoeira
• 17H30 Zezenaren taldea

HAURREN XOKOA

• 11,00 : Oinak arin
• 12,00 : bertsolari gazteak
• 14,00 : Goloka park
• 15,00 : Kiki Koko Moko

IBILBIDEAN ZEHAR

• Zo-Zongó
• Hankaluzeak
• Ziganteak
• Txarangak
• Dantza taldeak

IBILBIDEA